Ryders an chak thei lo

Samsung 3:16 Plan Solution Mizoram Super League awm hma season-ah Chaltlang Ryders-in Mission Veng Vikings ṭum hnih zet an hneh a, Zirtawpni tlaiah erawh Mission Veng Vikings 68-61 in an chak.

Hawla Indoor Sta­dium-a inkhelah Ryders-in bul an ṭan ṭha zawk a, first quarter-ah Chaltlang hian 15-7 ngawtin hma an hruai a, Lalmuanpuia Zote leh Richard Lalhmingliana te'n point ruk ve ve an score. Second quarter-ah Vikings captain Moses Zoremmawia'n point riat zet a score a, quarter hnihnaah hian Mission Veng hian point 22 zet an nei a; halftime-ah 29-26 in an lehthal.

Third quarter-ah Vikings tan Lalnunpuia leh Lalrina Renthlei te an lut thei a, quarter khat khelh hmabak la awmin 51-36 zetin hma an hruai tawh. Quarter tawp berah Ryders tan Mapuia a che ṭha a, team pumpuiin point 25 an rawn score nachungin Vikings an chesual duh lo, 68-61 in inkhel a tawp.

Chaltlang assistant coach Marc Lalthlamuana chuan, "Chak lo mah ila kan game a ṭha a, tun ang renga kan khelh theih chuan chak hun chu kan nei em em ang. Squad kima khelh kan chak tawh hle," a ti.

Mission Veng Vikings coach Reuben Lalchhan­dama chuan, "Chak mah ila kan khelh dan chu duh­thusam chu a la ni lo khawp mai. Hun tawp lama rebounds kan la thei lo lutuk te kha kan hmasawnna tur lai entirna ṭha tak chu a ni. Chutirhualin player-te an thawkrim a, team inlungrualna hi kan chakna chhan chu a ni," tiin hmasawn an la mamawh thu a sawi.

Score tamte :

VIKINGS : Lalrina Renthlei (16 Pts), Moses Zoremmawia (14 Pts), Lalnunpuia (14 Pts);

RYDERS : Lalmuanpuia Zote (21 Pts); Richard Lalhmingliana (11 Pts); Lalremtluanga (9 Pts).