FA Cup-a Aston Villa leh West Brom inkhelah buaina a chhuak

Inrinni zan FA Cup quarterfinal-ah Bradford leh Reading te goal awm loin an inhnehtawk a, March 16-ah replay an khel ang.

Quarterfinal inkhel dangah Premier League club Aston Villa-in an khelmual Villa Park-ah Fabian Delph leh Scott Sinclair te goal hmangin West Brom 2-0 in an hneh a, inkhelh banah buaina a chhuak a, field chhungah inkhel entu an tlan lut.

Sinclair-a'n goal hnihna a khung hma hian West Brom midfielder Claudio Yacob chu hnawhchhuah a ni a, hei hian boruak a ti ṭang lehzual. Hun tawp dawnah Villa substitute Jack Grealish chu hnawhchhuah a ni bawk.

Aston Villa manager Tim Sherwood chuan, "Kan chak hi kan supporter-te tan kan hlan a. FA Cup-ah hian nomawi chawi mah ila Premier League aṭanga kan tlak leh tho si chuan kan hlawhchham a ni," tiin league pawimawhna a sawi lang.

West Brom manager Tony Pulis chuan, "Referee thuthlukna a dik tawk lo a ni. Villa lamin venhimna an ennawn a ngai a, FA-in hrem ṭul chu a hrem tur a ni. 1980 leh 1970 chho vela thil thleng kha a thleng nawn leh a, a pawi takzet a ni," tiin Villa supporter-te chet dan a dem thu a sawi.