India-in super eight an lut chiang ta

ICC World Cup 2015-ah India an la chak vek. Zirtawpni khan inkhel hmuhnawm takah champion lai hian wicket liin West Indies an hneh a, quarterfinal an lut chiang bawk.

W.A.C.A. Ground, Perth-a inkhelah hian ṭhumvawrah West Indies an vannei zawk a, bat hmasak an thlang.

India bowler-te an che ṭha a, over 44.2-ah West Indies player-te an vawm out vek a, run 182 bak an tlin lo. India tan fast bowler Mohammed Shami a che ṭha a, wicket thum lain run 35 chiah a pe.

India hi awlsam taka chak mai tura ngaih an nih laiin batsman-te an che hleithei lo a, Rohit Sharna, Shikhar Dhawan leh Virat Kohli te'n run tam an siam hmain an out vek.

A hun takah India tan captain Mahendra Singh Dhoni a ding chhuak a, boruak sang tak hnuaia khel thiam bik anih zia lantirin run 45 a vawchhuak a, a tawpthlengin a dam. India hian over 39.1-ah run 185 an siam a, India a chakpui ta a ni.

Eng nge an sawi?

India captain MS Dhoni chuan, "Game harsa tak a ni. A pumpui thua thlirin kan khel ṭha thawkhat hlein ka hria. Kan lower middle order batsman-te an che ṭha tawk lo a, Ravindra Jadeja hian tun aia a khelh ṭhat a pawimawh a ni. Ani hi a rawn khel ṭha a nih chuan lower order-ah hian buaina kan nei lo ang," a ti.

West Indies captain Jason Holder chuan, "Bat hmasak kan thlang kha inchhirna ka nei lo a, kan batsman-te an khelh ṭha tawk lo deuh a ni. Kan theihtawp kan chhuah lo deuhin ka hria a, kan game-ah kan lut thei lo a ni. Ka mimal khelh danah chuan ka lawm khawp mai a, mahse team pumpui kan khelh ṭhat hi a pawimawh chu a ni," a ti.