Inkhel hmuhnawmah Zarkawt an ding chang

9th March, 2015

Samsung 3:16 Plan Solution Mizoram Super League-ah Zirtawpni zana Zarkawt BCA leh Tuikual South inkhel a la hmuhnawm ber. A tawp thlengin an inum chho zak zak a, hun tawpah BCA 65-63 in an chak hram.

Zarkawt leh Tuikual South te'n bul an ṭan ṭha ve ve a, first quarter zawhah 21-17 niin BCA an chungnung hret.

Second quarter-ah BCA an che ṭha zel a, point 23 zet an score a; Tuikual South erawhin point kua lek an thun. Halftime-ah 44-26 a ni.

Third Quarter-ah Tuikual South tan captain F. Zodinthara, David Lalnunsanga leh ChP-a te an che ṭha a, he quarter bikah hian 17-14 in Tuikual South an chak. Amaherawhchu a pumpuia an inthlauhna chu 58-43 a la ni tho.

Quarter tawp berah Tuikual South-in defence ṭha zawk an lantir a, Ch.P leh Dina te coach KC Lalliantluanga'n a rawn thlawp ṭha bawk. Second 20 vel chauh a awm tawh tih chuan BCA hi 64-63 chauhin hma an hruai tawh. Tuikual South-in free throw hmanga hma hruai an tum a, amaherawhchu captain Dina leh Steve Romuana te'n free throw aṭanga an chance neih an hlah ve ve a, hun ṭha an bawhpelh. BCA lamin point khat dang khung belhin 65-63 in hnehna an chang.

Zarkawt BCA Asst. Coach Lalruatfela chuan, "Tuikual South kan hneh kha chu kan vanneih vang liau liau a ni e. First half-ah kan khelh ṭhat tehreng nen second half-ah concentration kan hloh a, a pawi khawp mai. Chutihrualin a pawimawh ber point kan hlawhchhuah tho avangin kan lawm khawp mai," tiin an vannei tih a pha lo.

Tuikual South BC coach KC Lalliantluanga chuan, "Kan vanduai a ni. A tawpah kan kuta awm kan thlauh a ni ber mai. Lo chak ta hlauh pawh ni ila BCA kha an vanduai kan tih ve tho ka ring. Sang taka kan inthlauh hnua pawt thla leh tur khan tu team mahin min pui lo a, kan team beih ṭang ṭang vang liau liau a ni. Ka teammate-te ka chhuang hle. Tin, khatiang a ṭang thei tura game tluana min tiphurtu fans "tuikual south mipuite" beidawn lohna kha a ropui bawk," tiin inkhel chungchang a sawi.

Score tamte

BCA : Dennis Lalmuanpuia (19 Pts), David Lalruatfela (12 Pts) Jackson Lalrintluanga (8 Pts); TUIKUAL SOUTH : vanchuangpuia (17 Pts); F. Zodinthara (17 Pts); KC Lalliantuanga (11 Pts).