Mizoram 1-0 Railways Mizoram semifinal thlenna MK-a goal

Punjab-ah Santosh Trophy champion lai dal zo an awm lo. Inrinni tlai khan Mizoramin nikum final-a an hneh Rail­ways chu first half tawp hma hreta H. Lal­muankima goal hmangin 1-0 in an hneh.

Mizoram hi vawi thum khelhah chak vekin point kua an hmu a, Kerala-in an point hmuh zat ang chiah la hmu thei mah se head to head a tha zawk Mizoram hi Group B hmahruaitu an ni chiang tawh. Vawiin hian group match hnuhnung berah Mizoram hian Goa an hmachhawn ang.

Group A-ah Services leh West Bengal te'n point sarih an hmu tawh a, vawiin hian team pahnih hi an inhmachawn dawn. Pathumnaa awm point nga hmu tawh Punjab-in semifinal lut turin beiseina an la nei ve bawk.

Tute nge inlan?

A vawi khatna atan Joseph Lalnunpuia, Lalruat­fela leh Lallawmzuala te'n starting eleven an chang.

Goalkeeper : Lalawmpuia.

Defenders : Ronald Zothanzama, Lalrinchhana Tochhawng, Lalruatthara, Lallawmzuala (V. Lalṭanpuia 75').

Midfielders : Lalruatfela (Zico Zoremsanga 85'), Samson Ramengmawia , Johny Lalfakzuala, H.Lalmuankima.

Forwards : Joseph Lalnunpuia (Lalrinfela 65'), F.Lalrinpuia.

An inkhel e

Railways-in semifinal thleng turin chak ngei ngei an mamawh a, Mizoram tan hmachhawn an har sawt. First half-ah Railways an che ṭha zawk a, Mizoram-in goal an khung thung.

Minute 43-naah Ramthar tlangval Johny Lalfakzuala ball vawrh chu MK-a'n um lutin, Railways right back a bum hnuah keeper a pet khum a, 1-0 a ni.

Second half-ah Mizoram an insiamrem a, F. Lalrinpuia'n a khalh tlang hnuah crossbar a pet per a, Valpuia hian chance ṭha dang a hlah leh a. Lalruatfela leh V. Lalṭanpuia te'n goal khung theih tur nei mah se an khung bik lo.

Railways pawhin an siphurh sut theihna tur an nei a, amaherawhchu Mizoramin Lalawmpuia an nei a, Aizawl Venglai tlangval hian Mizoram goal a venghim. Santosh Trophy qualifier aṭangin Mizoramin goal an la chhuah lo.

Eng nge an sawi?

Mizoram coach H. Vanlalthlanga chuan, "Match tinin hmasawnna hmuh tur a awm zel a, a lawmawm hlein ka hria. Ruahsur vangin duh angin kan khel thei lo a, khua chu ro ṭha se goal thum tal chu kan khung theih ka beisei," tiin chak an phu thu a sawi.

SYS coach Chanmari enkawltu Thlanga chuan, "Ruahsur karah pawh Chandigarh leh Jalandhar Mizote aṭangin ṭawiawmna ṭha tak kan nei thei a, an chungah kan lawm takzet a ni. India ram hmun hrang hrang aṭangin kan chan­chin ngaihven an awm tih kan hria a, min ṭawng­ṭai pui zel turin kan ngen nghal bawk," a ti.