Mizoram an chak zo lo

Santosh Trophy champion lai Mizoram chak kaltluang a tawp ta. Mizoram hian a zawna match thum an chak hnuah nimin khan Goa nen 2-2 in an inhnehtawk.

Mizoram hi Group B hmahruaitu an ni a, March 13 khian Group A pahnihna West Bengal nen Ludhiana-ah an inkhel ang. Nimin khan West Bengal leh Services te 1-1 in an inhnehtawk a, vawiin inkhel tur Punjab-in point riat la hmu thei mah se beisei tur a nei tawh lo.

Team pathum hi an point hmuh zat a inang vek chuan an pathum inkhelhna en tur a ni a, Punjab hian an khingpui pahnih hi goal awm loin an draw ve ve a; West Bengal leh Services te 1-1 an inhnehtawk a, an pahnihin semifinal an lut daih.

Group A hmahruaitu Services hian March 12 khian Group B pahnihna Kerala an hmachhawn thung ang. Vawiinah Punjab leh Maharashtra bakah Railways leh Kerala te an inkhel ang a, inkhel result erawh awmzia a awm tawh lo.

Tute nge inlan?

Mizoram-in hmahruaitu ni chungin semifinal an lut chiang tawh a, Goa ham chhawn turin starting eleven-ah F.Lalrin­puia, H.Lalmuankima, Lalbiakhlua, Samson Ramengmawia, Lalruatthara, Ronald Zothan­zama leh Lalawmpuia te an tel lo. Captain Samson a tel loh avangin nikuma captain Zico Zoremsanga'n captain armband a hreng.

Goalkeeper : Lalruatpuia.

Defenders : Lalrinzuala Khiangte, Lalrinchhana Tochhawng, Vanlalchhanhima Sailo, Lallawmzuala.

Midfielders : Laldingngheta, Joseph Lalnunpuia (H. Lalmuankima 51') , V.Laltanpuia, Lalrinfela (Lalbiakhlua 70')

Strikers : Malsawmfela (F. Lalrinpuia 70'), Zico Zoremsanga.

Inkhel chu

Goa-in semifinal thleng turin chak ngei ngei an mamawh a, bul pawh an ṭan ṭha. Goa-in minute 11-na lekah goal an khung nghal a, minute li hnuah goal ban a pet per bawk. Mizoram-in Zico Zoremsanga an nei a, Khuangleng tlangval hian Laldingngheta cross chu si phurh sut nan a hmang.

Amaherawhchu Goa-in goal an khung leh a, goal hmasa ang thoin cross ball aṭanga lut a ni. Qualifier aṭanga goal chhuah tawh lo Mizoramin first half-ah goal hnih an chhuah.

Second half ṭantirhah Mizoram an vannei a, minute 47-naah Malsawmfela'n defender tihsual nangchingin a pet goal chiang hle. Semifinal lut chiang tawh Mizoram in chak an duh a; H. Lalmuankima, Lalbiakhlua leh F. Lalrinpuia te chu bench aṭanga luh tir an ni.

Police forward Valpuia'n ṭum hnih goal khung theihna tur chance a nei a, goal zawnah a pet lo ve ve a. Republic Veng tlangval Valpuia cross hi Zico-a'n a tauh fuh lo chiah chiah bawk. Mizoram an chak zo lo a, Goa an tla thung.

Coach a lawm

Mizoram coach H. Vanlalthlanga chuan, "Semifinal kan lut chiang tawh a, kan player zingah yellow card hmute an awm bawk avangin team kan siksawi a ni. Kan khelh danah kan lawm a, Goa khan chak an tum em avangin inkhelh awlsam a ni lo. Player-te'n theihtawp an chhuah a, kan khelh danah ka lungawi," tiin a sawi.