Infiamna kalpui dan thlak hret a ngai - Tetea Hmar

Sports Minister Lalnghinglova Hmar chuan, khawvel hriat hlawh khawpa Mizo te kan awm theih nan infiamna kan kalpui dan leh luhchilh bikte chu thlak danglam hret a ngai tih a sawi.

Thawhṭanni zan khan LPS Arena, Falkland-ah Zoliana Royte Memorial Hockey 5’s Indoor Tournament hawn a ni a, inelna hawngtu Tetea Hmar chuan, "Mizoramin infiamna kan kalpui dan thlak hret hret a ngai a. Eng infiamna huangah nge India leh Asia, khawvel huap thlenga hming kan chher ve theihna ni a, eng infiamnate nge kan uar bik ang, tih ngaihtuah chungin sorkar inher rem a tum.

"Hemi chungchanga inrawnkhawmna, Mizoram Sports Conclave chu kumin June thla khan Aizawlah neih a ni a. India-in Olympic Games 2036 thlen a tum a, Mizoram aṭanga infiammi tam thei ang ber tel ve kan duh. Hockey chu khawvel huapa India thatna a nih avangin, Vision 2036 Olympic Games-a game thlan bik tur zingah Hockey pawh a tel.

"Kawnpui Boys Hockey Academy chu partner neiin changtlung zawka kalpui tum a ni a, hma pawh kan la mek a ni," tiin a sawi a, Tournament buatsaihtu Aizawl District Hockey Association bakah sum tamtak sengtu Zoliana Royte (L) nupui Rozingi leh a fate chungah lawmthu a sawi bawk.

Hockey-ah Mizo hmeichhiate an thleng thui a, tun ṭuma hmeichhe team 16 inel tur zingah 2016 Rio Olympics-a tel India squad zinga mi Lalruatfeli'n Hnahthial District Association tan a khel dawn a, Railways player Lalhlunmawii'n Thenzawl Hockey Association tan a khel dawn bawk a ni.

Hmeichhe hockey hmunpui Thenzawl an langsar a, Hnahthial, Lunglei, Champhai, Saitual leh Mamit aṭangin district association team an tel bakah, Durtlang aṭangin team pahnih, Thingsulthliah, Hlimen, Sihphir leh Muthiin team khat an thawh.

Mipa team 18-in trophy an inchuh dawn a, India ram football inelna sang ber Indian Super League-a khel tawh Ricky Lallawmawma leh Isaac Vanmalsawma'n Durtlang Hockey Association tan an khel dawn a, player mala ngaihven hlawh zinga mi an ni.

Hetih lai hian mipa hockey hmunpui Kawnpui khua aṭangin mipa team panga an tel a, Durtlang leh Sihphirin team hnih ve ve thawhin Hlimen, North Lungleng, Sialsuk, Bungkawn, Samlukhai, Thenzawl, Hualngo, Kolasib leh Baktawngin team khat ṭheuh an nei bawk.

Ruahman dan chuan August thla tawp lamah final tura tih a ni. Kumin June 24-29 chhung khan Thenzawlah Zoliana Royte Memorial Hockey Tournament thawh khatna neih a ni tawh a, mipa team ruk leh hmeichhia team li an tel a ni.