MPL11 Aizawlah khelh zawh a ni dawn

LZ Juice MPL11 league round fixtures chu nimin khan puanzar a ni a, RG Stadium-ah vek khelh a ni dawn. MPL hi ṭum dangah chuan round khat hi district dangah khelh a ni ṭhin a; Lunglei, Champhai, Serchhip, Khawzawl leh Kolasib-ah te khelh a ni tawh a, kuminah erawh zin chhuah a ni dawn ta lo.

League round chinah zanah inkhel en tur a awm dawn lo a, match hmasa zawk hi chhun dar 12:30-ah khelh a ni ang a, a hnuhnung zawk hi tlai dar 3:30-ah khelh a ni ang.

MPL11 hi round 5 thleng khelh a ni tawh a, tunkar aṭangin khelh chhunzawm a ni leh dawn. Fixtures puanzar thar hi round 8 - 14 a ni a, league round hi October 1, Thawhlehniah khelh zawh a ni ang. Semifinal leh final khelh hun erawh puanzar a la ni lo.

Mizoram Premier League hi kum 2012 aṭanga khelh ṭan kha a ni a, Mizoram chhunga football inelna sang ber niin Mizoram Football Association leh Zonet buatsaih a ni.

Inelnaah hian team pariat an tel a, tun season-ah Chanmari FC, Aizawl FC, SYS FC, Mizoram Police, Sihphir Venghlun, Ramhlun Athletic, Chawnpui FC leh FC Bethlehem te an inel. Mizoram Police hi champion lai an ni a, Chanmari FC leh Aizawl FC te chauh hi season tina la tel an ni thung.