Mizoramin Tripura an sawp

63rd Subroto Cup International Football Tournament Sub Junior Under 15 inelnaah Mizoram chuan nimin khan match hmasa ber an khel a, Tripura chu 6-1 in an sawp. Mizoram hi SYS coach Lalthawmmawia'n (Mamawia) leh manager Rozamliana (RZ-a) ten an hruai a ni.

Bengaluru-a inelna neihah Mizoram hian Zodinpuia hmangin minute sarihna lekah an khung a, Ronald-a'n minute 23-naah Tripura-in siphurh an sut. Inkhel hi minute 50 chhung khelh a ni a, first half-ah 1-1 a ni. Second half-ah Mizoram an che ṭha a, minute 25 chhung goal nga an khung belh.

Nikum finalist Mizoram tan Sihphir rawlthar Zodinpuia'n a khung belh bakah captain Lalvohbika'n hattrick a siam a, Zonuam rawlthar Vanlalmuana'n goal khat a khung belh bawk.

Mizoram hi group H-ah CBSE, Tripura, Bihar leh Haryana nen an awm ho a, Bihar hi disqualify an nih avangin pali chauh an awm. Group pakhat aṭangin pakhat chauhin knockout stage an lut dawn a, hei vang hian nimina goal ruk an khung hi a hlu hle.