Foxes khelmualah Spurs an chak zo lo

Kum 37 ni tawh mah se, Jamie Vardy-a'n a la tar lo tih Premier League-ah a puang leh ta - season khat Championship lama hun a hman hnuin Vardy-a'n Premier League a khel ve leh ta a, a lo kir lehna match hmasa berah goal a khung nghal.

Thawhṭanni zan khan Premier League match-ah kai thar Leicester City-in champion tum Tottenham Hotspur an lo mikhual a, 1-1 in an chelh. Spurs hian Pedro Porro hmangin goal hmahruai khung mah se, Vardy-a'n a chhanletna goal a khung a, chak zawk an awm lo.

Vardy hian lakchhuah a nih dawnin Spurs fan-te a tihel zui a, an kawr bana Premier League nomawi lem chu kawkin, PL title a lak tawh thu zaizirin a hrilh a, Spurs fan-te chu an la champion ve loh thu a hrilh zui!

Tottenham fans tan Vardy-a chet dan a ngeiawm a, a na. Mahse, an rilru natnate chhawk zangkhai turin London club-in hnehna hlado an chham thei lo a, league match hmasa bera chak zo lo nghal team tan champion sawi rik ngam a harsa ang.

A goal hma

Kum khat Championship-a hun an hman hnuah Premier League khel turin Leicester an lo kir a, King Power Stadium-ah thawm a ṭha hem hem hle - mahse, minute 29-naah Premier League nunrawnna Foxes-in an tem nghal a, goal an chhuah.

Leicester player hlui James Maddison-a siamsak chu Pedro Porro chuan hnai tak aṭangin a tauh goal a, Foxes fan-te thawm a reh duk. Spurs hian inkhel an thunun chhunzawm a, budget lian zawk leh player ṭha zawk an nihna a lang.

Spurs tan striker Dominic Solanke-a'n goal khungna remchang nei mah se, a chance neih ṭhatte a chhawr ṭangkai tawk lo - Foxes goalkeeper Mads Hermansen tan hna harsa an tling pha lo a, an him.

London club vanneih zan ni se, chawlhlawkah chuan hahdam taka chawl thei tawh tur an ni a, mahse, season hmasaa an buaina tho kha an buaina a la ni reng a, movement ṭha leh hmuhnawm hmuh tur awm fo mah se, a hmawr an bawk thei tlat lo.

A hming Vardy

Spurs-in an chance neih an chhawr loh an tuar vat a, a hremtu chu tawnhriat nei ṭha Vardy a ni - English striker hian Abdul Fatawu-a cross chu hnai set sawt aṭangin a tauh lut a, kum 37-ah pawh a la rintlak reng.

Mahse, mihring kan ni miau a, Vardy pawh a kum a tam ve deuh ta tih hmuh tur chu a awm tho. England international hlui hian chance duhawm tak nei zuiin, keeper Guglielmo Vicario chiah a hmachhawn chungin goal-ah a chantir thei lo.

Vardy-a goal khung lohna hi a vanglaia a khung fona kha a ni a, danglam chu a awm ve ṭan tih a lang. Hetihrual hian Thawhṭanni zan inkhelah hian Vardy hi a inlan a rinawm lo hrim hrim a, hliam damkawr a ni.

Mahse, player inhliam an awm nual avangin a inlan a, goal a khung! Leicester boss Steve Cooper chuan, "Thla hmasa lawk khan a inhliam a, vawi khat chiah training nei chungin a rawn inlan a, goal a khung zui a ni," tiin a striker a fak.

Spurs an nil

Tottenham-in first half-ah game an thunun a, Premier League 'Big Six' huanga an elpui club dangte chu ni se, khati taka game thununah kha chuan point thum an hlawh chhuak ang - Spurs erawh an ni ve lo a, an tuar.

London club hi goal hmaah an hriam tawk lo a, Harry Kane chhuah hnuah a hmun ruak luahtu an nei lo - i awih loh chuan season hmasaa an game thlirlet rawh. He buaina hi kuminah chinfel tumin Solanke an la lut a, a chhanna an la hmu rih lo.

Bournemouth aṭanga lakluh player hi pound maktaduai 65 thlenga a man sang chho thei turin lei a ni a, season hmasa khan league-ah goal 19 ngawt a khung avangin a lakah pawh beiseina a sang.

Match khat aṭanga teh nghal tur ni lo mah se, Liverpool striker hlui hian pressure a la zo tawk lo niin a lang a, Spurs-in season zawna Champions League khelh phak loh an hlau a nih chuan a hmawr bawk tura Solanke-a inchher hriam lehzual a ṭul ang.