A hun tea rah ṭhin Vardy

Kum 2012 thleng kha chuan Jamie Vardy-a'n non-league a la khel a, kum 2024 a herchhuah meuh chuan Premier League chanchina striker ropui pawlah chhiar tel a ni zel tawh - a nemnghettu chu Tottenham Hotspur laka a goal kha a ni.

Vardy hian 2014-15 season khan mak takin Leicester City chu Premier League nomawi a chawipui a, a hawikir leh tawh lo. Spurs laka goal a khung chiah khan Premier League-a goal 137 a khungna chiah a ni a, match 307 bak a mamawh lo.

Season hmasa kha Championship-ah hun an hmang a, Premier League champion an nih ṭuma club lian zawkte sawmna hnartu hian division hniam lamah pawh Foxes a khelhpui zel - English top flight league an kir leh nana player pawimawh a ni.

Vardy hian season hmasa khan inelna hrang hrangah match 37 khelin goal 20 ngawt a la khung a, vawi hnih assist a nei. Mahse, a vanglai ang erawh chuan khelmualah hun a hmang tam tawh lo.

Match 37-ah hian vawi 17 chu bench aṭanga luhtir a ni a, vawi 18 lakchhuah a ni - match hnih chiah minute 90 khelh tluan a nei tihna a ni. Season tawp rual khan Foxes-a a contract a zo a, mahse, season khat dang contract thar pek a ni.

Hliam a neih avangin a inlan lawk a rinawm lo a, mahse, striker tawnhriat nei ṭha dang an inhliam avangin rin loh takin Spurs lakah bul a ṭan a, goal a khung.

Foxes coach Steve Cooper chuan, "Khelmuala luh châkin a tuihal tih a pholang a, a hna ngai a thawk leh ta a ni. Box chhungah ball ṭha pangngai tak kan thlawh lut a nih phawt chuan hmun awl insiam a, a hmawr bawk tur kan nei tih kan inhre sa a ni," a ti.

Vardy hian Leicester tan hian Premier League, FA Cup, Community Shield leh Championship (2) nomawi a chawi tawh a, 2015-16 khan Premier League Player of the Season a lo ni tawh a, 2019-20 khan goal 23 khungin top scorer a ni bawk - legend tih loh rual a ni lo e.