Tiafoe hnehtu Sinner a chungnung

Jannik Sinner chuan mipa tennis world number 1 a nihna chu a takin a lantir leh ta - nimin zing khan inkhel hmuhnawm leh hautak takah Frances Tiafoe hnehin Cincinnati Open title a la.

Italian tlangval Sinner hian a match hmasa lamah Andrey Rublev leh Alexander Zverev te chu set thum an khelhpui hnuin a hneh a, a hautak thei hle. American tlangval Tiafoe hi 7-6(4), 6-2 in a hneh thung.

Lindner Family Tennis Center-a inkhelah hian world number 1 Sinner hian vawi 13 ngawt aces a siam a, a service ṭha tak chu a dan chanpui tiin a sawi theih, a khingpui service vawi hnih chhuhsakin ama service a hum vek thung.

Kum 23 mi Sinner chuan, "Ka tan chuan chawlhkar hautak leh harsa tak a ni chiang ngei mai, hetiang hun hautak tak mai ka paltlang theih erawh thil hlu leh lawmawm tak a ni thung, taksa bakah rilru a hah tel bawk.

"Ka theih leh thiam ang tawkin ka bei a, a ṭha thei ang bera khelh chhuah kha ka tum bawk. Hun pawimawh laia ka chet ṭhin danah kha ka lawm, tournament dangah pawh ka chhunzawm theih ka beisei," a ti.

Sinner hian Tiafoe hneh tur khan darkar khat leh minute 37 chhung hun a hmang a, tun season kal laiah Australian Open Rotterdam, Miami leh Halle Open title a la tawh a, tunah Cincinnati Open nomawi a chawi leh ta chiah.

Tun season bikah chuan, mipa player zingah ATP Masters 1000 title pahnih la thei awmchhun a la ni rih a, tennis a khelh hun chhunga a nomawi 15-na a ni chiah bawk - hmabak tam tak a la nei.

Sinner hian Wimbledon khelh zawh hnu khan chawlh zeuh a duh a, hei vang hian Olympic a khel lo. Infiamna khawmpui lian a inlan loh chhan kha Tonsil vang nia sawi a ni a, tunah erawh hard court inelna lian hmachhawn turin a inpeih leh tawh.

Kar leh aṭangin tun season chhunga tennis inelna lian hnuhnung ber US Open an khel ṭan leh tawh dawn. New York khawpui pan turin Sinner a inpeih ta hle a, player ṭha dangte nen inelna hautak an hmachhawn ho leh dawn a ni.

Grand Slam vawi 24 champion tawh Novak Djokovic chu Olympic hnuah a la hahchawl a, US Open-ah a lo kir ang. Cincinnati Open-a beisei phak lo Carlos Alcaraz pawhin a ṭha thei ang bera inelna hmachhawn a tum thu a lo sawi ve tawh bawk.