Cincinnati Open champion Sabalenka

Aryna Sabalenka chuan nomawi a chawi leh ta - season tir lama Australian Open title a lak hnua a nomawi chawi lehna hmasa ber ni turin Cincinnati Open-ah a champion a ni.

Thawhṭanni zan final inkhel hmuhnawmah, player ṭha Sabalenka hian darkar khat leh minute 16 chhungin Jessica Pegula chu 6-3, 7-5 in a hneh a, Grand Slam dawta inelna ngaihhlut WTA 1,000 Masters title paruk a la tling ta chiah bawk.

A chak lo zawk Pegula pawh tun hnaiah khel ṭha ṭhin a ni a, a zawna match kua ngawt a chak kaltluang chu a tawp - tun thla tir mai khan Canadian Open nomawi a kawl lai a humhim a, a zawnin champion tum viau mah se a hlawhtling zo ta lo.

Belarus nula Sabalenka chuan, “Ka hliam damna a la rei lo, hetiang chunga nomawi ka chawi thei hi ka tan chuan a hlu takzet a ni. Hliam neih leh hlau tak chungin ka inkhel a, chutiang tawng loa ka awm thei hi ka lawm bawk.

“Ka team lamin a ṭha thei ang bera ka khelh chhuah theihna turin theihtawp an chhuah a, a tawpah a rah kan seng ho ta a ni,” a ti. Sabalenka hian a dar (shoulder) hliam vangin grass court inelna lian Wimbledon kha a khel thei lo a, tunah chuan nomawi a chawi leh der tawh.

Women's Tennis Association (WTA) ranking a chhuah thar hunah chuan, world number 3 Sabalenka hian a chunga awm Coco Gauff lehpelin pahnihna a luah ang - Gauff hi pathumnaah a tlahniam thung dawn a ni.

Grand Slam vawi hnih champion tawh Sabalenka hian Cincinnati Open champion a nih theihna tur hian, a kalkawngah world number 1 Iga Swiatek pawh a hneh - season kal laia Grand Slam hnuhnung ber tur US Open atan pawh inrintawkna a nei sang hle ang.