Kai thar Como tan Juve an lian

Juventus coach thar Thiago Motta chuan a team a kaihhruaina match hmasa berah harsatna an tawk lo - Old Lady hian Serie A season thar an match hmasa berah kai thar Como chu 3-0 in an sawp.

Thawhṭan zan Serie A inkhel dangah Atalanta chuan Lecce chu 4-0 ngawtin an sawp bawk a, Italian football inelna sang berah hian match khat ṭheuh an khelh hnuah goal khung hnem ber niin table hmahruaitu an ni.

Atalanta tan hian Marco Brescianini leh Mateo Retegui te chuan goal hnih ve ve an khung. Kar tawp inkhel dangah champion lai Inter Milan leh AC Milan te chuan an khingpui ve ve an lo hneh zo lo tawh thung.

Motta-a Juve

Turin khawpuia khelmual hmingthang Allianz Stadium-a inkhelah Juve tan forward Samuel Mbangula leh winger Timothy Weah ten chawlhlawk hmain goal an khung, an pahnih tan Serie A bika an goal hmasa ber a ni.

Hun tawp dawnah Andrea Cambiaso chuan a belh bawk a, harsatna lian tham nei loin Motta hnuaia Serie A match an khelh hmasak berah point thum an hlawh chhuak, beisei an nei sang chho ang.

Motta hian season hmasa khan Bologna a enkawl a, mite rin loh tak ni mah se Champions League khel turin a tlinpui thei, a thil tih avang hian Juve chian a chungah rinna an nghat a, kum li hnua Serie A champion nih pui theih beisei in an lalut.

Kum 41 mi Thiago Motta chuan, "Kan khelh dan leh result kan neihah hian sawisel tur ka hre lo. Chutihrualin hmasawn kan ngaihna lai ṭhenkhat ka hmu bawk, statistics hmangin chu chu chiang takin a lang.

"A bul ṭanna a fuh chuan a lehpek pawh a phurawm ṭhin, tuna kan khelh dan hi kan nihna tak a la ni lo tih erawh kan hriat a ṭha ang," a ti. Juventus hian an match lehpekah chuan Hellas Verona an tum dawn, boruak a danglamin a rinawm.

Cesc leh a naute

Como hi Arsenal, Barcelona leh Chelsea midfielder hlui Cesc Fabregas enkawl an ni a, an player-te mai bakah an club aiin an manager hian hriat a hlawh zawk hial, phur viau mah se Juventus mualah meuh chuan an ruh a la no hle.

Spanish manager hian season hmasa khan Como hi Italian football inelna sang ber dawtah pahnihna a nih pui, a chunga awm Serie B champion Parma an tluk lohna chu point thum chauh a ni, kuminah Serie A an khelh theih phah.

Fabregas chuan, "Season hmasa khan Palermo lakah 3-0 in kan chak lo a, a hnu lamah erawh insiamṭha in Serie B team ṭha berte zinga miah kan insiam thei, tun ṭumah pawh hian kan tih dik tawk loh lai uluk takin kan zirchiang ang.

"Serie B kan khelh laia player pariat ngawt tunah hian kan la nei, chuvangin kan danglamna a la tam lo. Juve khan keini aiin inrintawkna an nei sang zawk a, chu tak chu kan inthlauhna lai a ni, keini pawhin anmahni ang khan kan ti thei," a ti.

Como hian tawnhriat nei ṭha tak mai Raphael Varane an lalut a, mahse Real Madrid leh Manchester United defender hlui hi Coppa Italia an khelh ṭumin a inhliam a, tun ṭumah hian an la chhawr thei rih lo a ni.