Chelsea-ah Joao Felix a kir dawn

Chelsea chuan Joao Felix chungchangah Atletico Madrid nen inremna an nei a, kum 24 mi Joao Felix hian kum ruk daih contract ziah a remti a, kum khat pawhsei theih dan a awm bawk.

Blues hian Atletico striker Samu Omorodion lak tumin an dawr a, player contract chungchangah inremna a awm tak theih loh avangin kar liam ta aṭang khan Joao Felix lak tumin hma an la ṭan.

Portuguese forward Joao Felix hian 2022-23 season chawhnu lam kha loan hmangin Chelsea tan a khel a, Premier League match 20 aṭangin goal li a khungsak. Season liam ta khan Joao Felix hian loan hmang thoin Barcelona a pawm a, match 44 aṭangin goal 10 a khung bakah assist vawi ruk a nei.

Catalan club a zawm hma hian Joao Felix hian Atletico Madrid-a a contract neih chu June 2029 thleng a pawtsei. Portuguese forward hian kum 2019 khan Benfica aṭangin Atletico hi €126m-in a zawm a, Spanish club tan hian match 131 aṭangin goal 34 a khung.

Joao Felix hian Portugal tan match 41 a khel tawh a, Euro 2024-ah pawh khan match hnihah a inlan. Germany-a Euro C'ship khelh zawh hnuin season thar atana inpuahchah turin Atletico-ah training a zawm a, tunah chuan England a pan dawn.

Chelsea hian Joao Felix hma hian Tosin Adarabioyo, Omari Kellyman, Marc Guiu, Kiernan Dewsbury-Hall, Renato Veiga, Caleb Wiley, Filip Jorgensen, Aaron Anselmino leh Pedro Neto te an lalut tawh a ni. Blues-in Joao Felix an lak theih dawn avangin Spanich club pawhin Conor Gallagher an lak theih a rinawm.

Gallagher hian Atletico Madrid a zawm dawn emaw tih vek hnuah Stamford Bridge-ah a kir leh a, Chelsea-a hun hmang leh tura ngaih a ni hman. England international hi La Liga club nen pound maktaduai 34.5 zetin an inrem a, ni nga chhung ngawt chu Madrid khawpuia Hotel-ah pawh a lo va cham hman. Metropolitano Stadium-ah pawh a hmel a inlan hman hial.

Mahse, Atletico Madrid hian Manchester City aṭangin Julian Alvarez chu pound maktaduai 81.5 tehmeuhin an lei a, player dang lei leh tur chuan an neih sa an hralh ṭhen phawt a ngai niin an sawi. Tunah erawh Joao Felix-a'n Chelsea a pan dawn a, Atletico tan Gallagher lak theihna hun a inhawng.

Kum 24 mi Gallagher hian Staford Bridge-ah thla 11 daih chiah contract a nei tawh, nipui bazar lehpekah a thlawn a chhuah tir ai chuan Chelsea tan tun nipui bazara hralh mai hi a finthlak ang.

Season liam ta khan Gallagher hian Cheslea tan match 50 khelin goal sarih leh assist vawi kua a nei a, Mauricio Pochettino hnuaiah Premier League match khatah chauh bul a ṭan lo. A khelh loh ṭum hi hrem a nih vang a ni.