Brighton player man to ber Rutter

Premier League club Brighton & Hove Albioan chuan an club chanchina player man to ber ni turin forward Georginio Rutter an la lut a, Leeds United aṭanga French forward lei chhuak tur hian pound maktaduai 40 an inseng.

Kum 22 mi Rutter hian kum nga chhung Brighton tana khel turin contract a ziak a, Leeds-ah hian kum khat leh a chanve bak a khel hman lo - January 2023 khan Hoffenheim aṭangin Leeds hi a pan a, £36mtd man niin, Leeds hian an player to ber ni turin an lei ve tho.

Tunah Brighton player man to ber a ni leh ta a, Rutter-a chungah beiseina a sang ang. Brighton technical director David Weir chuan, "Player thiam bik a ni a, Brighton-a kan la lut thei hi kan lawm takzet. Kan club-ah hma a sawn zel pawh kan beisei," a ti a, beiseina a nei sang hle.

Brighton manager Fabian Hurzeler chuan, "Georginio hi fan-te tana inkhel hmuhnawm pho chhuak thei khawpa thiam bik a ni a, Leeds tana khelin English football-ah pawh a theihna a lo pho chhuak tawh - kei chuan Germany-a Hoffenheim tana a khelh lai khan ka hre daih tawh a ni," a ti.

Kum 31 mi ni a, Premier League-a coach naupang ber ni mek Hurzeler chuan sawi zawmin, "Tunah chuan kan team-ah kan lo lawm ang a, hnathawhpui kan châk tawh hle," a ti - Leeds chuan Rutter hi chelh tumin theihtawp chhuah mah se, an chelh theih loh thu an sawi.

French club Rennes aṭanga a professional zinkawng zawh ṭantu Rutter hian Leeds tan inelna hrang hrangah match 64 khel hmanin goal riat a khung a, season hman zawh takah khan Championship team of the season-ah a lang phak.