Man United-ah Berrada hnathawh a lang ṭan

Manchester United chuan kumin January thla khan City Football Group hnuaia chief football operations officer Omar Berrada chu la lutin chief executive hna an chelhtir.

Manchester City indintharna tura mi pawimawh Berrada hnathawh hi nipui bazarah a lang ṭan a, Man United-in tun season-ah first team-a chhawr tlak player pali Joshua Zirkzee, Leny Yoro, Matthijs de Ligt leh Noussair Mazraoui te lalut tawhin player pakhat manah £60m aia tam seng an la nei lo.

Tuna Man United kal dan hi Man City-in hun rei tak Omar Berrada hnuaiah an lo kalpui tawh a, chief executive thar hnuaiah kalphung thar a awmah a ngaih theih.

Nipui transfer-ah Man United-in hmabak an la nei a, lut leh chhuak tur an la awm. Uruguayan midfielder Manuel Ugarte chu PSG aṭanga lakluh tumin an dawr mek a, player contract chungchangah erawh July thla khan inremna an nei tawh.

Facundo Pellistri erawhin Panathinaikos a pan dawn. Uruguayan winger man hi €6m a ni a, Greek club hian an hralh a nih chuan Man United-in hlawkna an theih dan a awm bawk.