City-in Gundogan an ngaihven

Season khat Barcelona-a a khelh hnuin Ilkay Gundogan chu club thuneituten a chhuah an phalsak thu an hrilh a, a club hlui Manchester City chuan German midfielder hi lak let dan ngaihtuahin an dawr.

Kum 33 mi Gundogan hian 2022-23 season khan City-a a contract a hmang zo a, Etihad Stadium lamin chelh duh mah se, Barcelona tana khelh thlangin, Spain a pan. Mahse, Barca-ah season khat chiah a khelh hnuin a chhuah phalsak a ni a, England, Spain, Saudi Arabia leh Qatar aṭangtein sawmna a hmu nghal anga sawi a ni.

Borussia Dortmund aṭanga hming chhertu midfielder hi a club hlui City lam chuan an la duh reng a, coach Pep Guardiola pawhin Gundogan la let tura hmalakna hi a pawmpui thlap niin an sawi.

Gundogan hi khawthlang media ṭhenkhat chuan coach Hansi Flick ruahmannaa a tel loh avanga chhuah phal angin an sawi a, mahse, Flick ber hian Gundogan chu a chhuah loh hram a beisei thu a sawi lawi si - German coach hian Germany national team-ah Gundogan hi a lo enkawl tawh.

Flick chuan, "Gundogan hi ka hrechiang a, player a nihna piah lamah a mihring mihrinna pawh hi ka ngaisangin ka zah hle. Engkim kan sawi dun a, mahse, kan thil sawi dunte erawh kan pahnih inkara vawn reng tur a nih avangin ka puangzar lo ang. Nou Camp-ah a cham ka beisei," a ti.

Hetihrual hian Barca thuneitu lam hian Gundogan hi chhuak tura an duh chhan chu an sum dinhmun vang niin a lang. He thu buatsaih a nih thleng hian euro maktaduai 60-a an lei Dani Olmo chu La Liga-ah an ziak lut thei lo a, hei hi an sum dinhmun chhiat vang a ni.

La Liga hian club tinten awmze nei zawka inrelbawlna an kalpui theih nan dan khirh tak an nei a, an sum hman theih zat thlengin an bituk. Barca hian tuna an squad hi an ṭhuahfai phawt loh chuan player an ziah luh belh thei rih lo.

Hetiang a nih avang hian Gundogan hi chhuak mah se an pawi ti lo niin a lang a, captain Sergi Roberto an chhuah zalen tawh a, full back Julian Araujo chuan Bournemouth a pan bawk.

Tun dinhmunah Gundogan bakah hian striker Vitor Roque chu hralh an tum nia sawi a ni a, squad siksawi hna an thawk mek. Germany tan vawi 82 inlana goal 19 khungtu Gundogan hian tun hnai khan ram tana inkhelh a chawlhsan thu a puang bawk a, German midfielder hian, "Club leh ram tana match kan khelhte hi a tam em a ni," tiin hahdam zawka inkhelh a duh thu a sawi.

Gundogan hian Xavi enkawlna hnuaiah match 51 khel hmanin, goal nga a khung bakah assist vawi 14 a nei a, amah duhtu zingah Galatasaray leh Jose Mourinho enkawl Fenerbahce pawh lam rik zingah an tel.