LZ Juice MPL11 : Tlai dar 3:30-ah SYS FC Vs Chanmari FC

I Day Football vanga LZ Juice MPL11 chawlh rih a nih hnuah vawiin aṭangin khelh chhunzawm a ni dawn. Tlai dar 3:30-ah hmahruaitu Chanmari FC leh kai thar SYS FC te RG Stadium, Mualpuiah an inkhel ang. Lalsangzuala Hmar hote hi round 5 thleng kal vung viau mah se I Day Football-ah hmeh mih an ni a, SYS FC laka insiamrem a awlsam lo ang.

Lalmuankima enkawl SYS FC hian MPL11 an la thutak a, Mizorama football inelna sang berah result neih an duh avangin I Day Football chhung zawngin Lungleiah first team-in training an nei. Chanmari lakah SYS FC ṭha zawk lantir tan tum dawn a ni.

Beiseina nung nei SYS

I Day Football-ah Chanmari FC leh SYS FC te hi group khatah an awm a, match hmasa berah an inkhel nghal. Coach Sanga hote hian SYS FC reserve team tia chhal theih an hmachhawn avangin chak chiang tura ngaih an ni a, mahse 2-1 in an hneh hram.

Chanmari FC hian MPL11-ah goal an la chhuah miah lo a, SYS FC lakah goal an chhuah - tun season-a an goal chhuahna hmasa ber a ni. SYS coach Lalmuankima chuan, "I Day Football-a kan naute khelh danin minti lawm a, rilru lamah pawh min pui khawp ang. Keini lamin kan duh ber chu chak a ni a, chumi tur chuan theihtawp kan chhuah ang," tiin Vanglaini a hrilh.

SYS FC hian Chanmari FC lakah chak tumin an khel dawn a, chumi ti thei tur rawlthar ṭha rual an kawl avangin thil theih loh tum an ni lo. Tlarhma lamah Ricky H. Vanlalhriatsanga leh Lalruatsanga te an hmuhnawm ṭhin a, midfield-ah Joel Lalramengmawia a rintlak. Chanmari lakah an theihna lantir an tum dawn a ni.

Khawpui a ri dawn?

Chanmari FC-in season liam ta khan Lalkhawpuimawia an lalut a, an media team pawhin Kelkang striker an lakluh hian AC/DC hla 'Thunderstruck' hmangin mipui hmaah an rawn chhawp chhuak.

Mapuia hian MPL10-ah Chanmari tan goal nga a khung a, final a thlenpui. Mahse, Mapuia hi final-ah a inhliam a, Chanmari FC-in an striker pawimawh tel loin Mizoram Police an hneh lo. Santosh Trophy qualifying round-ah Mizoram tan Mapuia hi rinrawl a ni a, goal riat khungin India ram pumpuiah top scorer a ni.

MPL11-ah pawh Chanmari hian Mapuia bawk an rawn hmachhuan a, mahse match hmasa bera FC Bethlehem an hneh ṭumin a biang ruh an tauhsak avangin a inhliam nghal. Mapuia tel lohna Chanmariin goal khung an harsat a, MPL11-ah che ṭha mah se anni aiin Aizawl FC (14), Ramhlun Athletic (11) leh Mizoram Police (9) ten goal an khung tam zawk.

Chanmari hian goal khung thei player an mamawh a, Mapuia hi mamawh chhanna ni thei tura ngaih a ni. I Day Football hmain training a zawm leh tawh a, Chanmari coach Lalsangzuala Hmar chuan khelhtir a tum thu Vanglaini a hrilh.

Coach Sanga chuan, "I Day Football-ah nomawi kan chan a, kan chawlh hun chhung neih ang hmang ṭangkai hle. Player-te load kan pe sang a, MPL11-ah rah ṭha a thlen kan beisei. Goal khungtu kan mamawh a, chuvangin Mapuia hi khelh tir ka tum," tiin Vanglaini a hrilh.

MPL11-ah Chanmari hi Aizawl FC nen an inhnehtawk tih loh chu an la chak vek a, goal an la chhuah loh bawk avangin SYS FC lakah chak tura rinkai zawk an ni ang.