Chawnpui an tho chhuak dawn em?

LZ Juice MPL11-ah Chawnpui FC-in season bul an ṭan pha lo a, MPL9 champion hian match ngaah point nga chauh hmuin relegation zone-ah an awm mek. Vawiin chhun dar 12:30 hian Chawnpui FC-in team thar Ramhlun Athletic FC an hmachhawn dawn a, B. Malsawmzuala hote tan dinhmun siamṭhat theihna remchang a ni thei ang.

Chawnpui hian MPL11-ah beisei pha tawk lo mah se team ṭha pathum Chanmari FC, Aizawl FC leh Mizoram Police te an hmachhawn tawh. Coach Sawmtea hote hian semifinal khelh phak an tum a nih chuan Ramhlun Athletic hi an hneh a ṭul. Chawnpui hian I Day Football-ah semifinal thleng pha lo mah se ISL club NorthEast United reserve an hneh a, champion zui ta Mizoram Police lakah goal khat chuahin an tlawm bawk.

Sawmtea enkawl Chawnpui hian tho chhuak turin MPL-a tawnhriat nei ṭha Vanlalthanga an kawl bakah David Laltlansanga, Thangzawmsanga, Lalnunsiama leh Laltluangliana te an nei a, result ṭha nei thei tur an ni.

Chutihrualin Ramhlun Athletic hi dah hniam an thiang lo a, MPL11-ah chuan Ramhlun Athletic aiin result an nei ṭha zawk. Danny Lalduhawma enkawl Ramhlun hi an goal bawh a na a, goal 11 an khung tawh.

Serchhip tlangval Felix Lalruatsanga'n MPL-ah goal nga a khung tawh. Ramhlun tlarhma te hi vanneih vanga goal khung tam ngawt an ni lo tih lantirna chu I Day Football-ah pawh goal an khung tam tho a, goal 15 ngawt an khung.

Armed Veng FC aṭanga an lakluh Richard Lalramnunpuia'n I Day Football-ah goal li a khung a, midfield aṭangin Flavius Lalruatkima leh Isak Vanlalpeka ten an khung theih bawk avangin Chawnpui tlarhnung tan hna a tam khawp ang.