Subroto-ah Mizoram an chak chiang

63rd Subroto Cup International Football Tournament Under 15-ah Mizoram team an chet ṭhat chhunzawm zel a, nimin khan Haryana chu 12-0 ngawtin an sawp a, an chak chiang hle.

Mizoram tan captain Lalvohbika bawk a langsar leh a, Durtlang naupang hian goal li ngawt a khung - Vohbika hian Tripura lakah hattrick a lo siam tawh bawk a, tun inelnaah goal sarih a khungna chiah a ni.

Nimin inkhelah hian Mizoram tan Zodinpuia, Lalrinhlua leh Vanlalmuana te chuan goal hnih ṭheuh an khung bawk a, Lalfakmawia leh Vanlalchhanhima ten goal khat ve vein scoreline an cheimawi bawk.

Mizoramin match hnih an khelh tawhah hnehna an la chang ve ve a, match hmasa zawkah Tripura chu 6-0 in an lo sawp tawh. Mizoram hian match hnih khelh tur an la hmabak a, C.B.S.E leh Bihar an la tawng leh ang.

Group tin aṭangin a sang ber ṭheuhin quarterfinal an lut nghal dawn a, Mizoram hian match hnih hnehna chang tawh mah se quarterfinal lut turin point khat an la mamawh.

Mizoram hian vawiin tlai dar 4:00-ah C.B.S.E an hmachhawn dawn a, point khat chauh pawhin quarterfinal an lut dawn tihna an ni - an chak ngei a rinawm.