India squad-ah Mizo pali

Manolo Marquez chuan India coach a nih hnua a squad hmasa ber a puang a, nimina India tana inlan tura koh chhin player 26 zingah Mizo pali an tel - September thlatir hian international break hman a ni dawn a, hemi atan hian India squad hi puan a ni.

Mizo player zingah hian regular taka India tana inkhel Lallianzuala Chhangte a tel a, Lalengmawia Ralte (Apuia) pawhin World Cup qualifier-ah exam tur a neih avangin kohna hnar mah se, FC Goa coach ni tel Manolo-a'n a ko tho!

International break hnuhnung bera koh David Lalhlansanga'n a club thar East Bengal tan match thumah goal hnih khung mah se, Manolo-a'n a squad hmasa berah a telh lo a, Edmund Lalrindika erawh a lang thung.

Manolo hian Odisha FC midfielder K. Lalṭhathanga (Puitea) a ko bawk a, FPAI Young Indian Player of the Year ni lai Isak Vanlalruatfela tan hmun a awm lo bawk - David hi AIFF Young Player of the Year ni lai a ni bawk a, Indian football-a award ngaihhlut hlawh pahniha best young player-te tan hmun a awm lo tihna a ni.

Blue Tigers hian international break chhung hian Hyderabad khawpuiah Intercontinental Cup an khel dawn a, India bakah hian inelnaa tel tura sawm, FIFA ranking-a 93-na Syria leh 179-na Mauritius te an inlan dawn - Manolo tan fiahna hmasa a ni ang.

India squad-te hian August 31 aṭangin Hyderabad-ah hian training an ṭan dawn a, player hi la thlitfim leh tur a ni ang. India coach Manolo Marquez chuan, "Kan phur tawh hle a, player-te pawh an phur viauin ka ring.

"Team pahnih kan hmachhawn dawn a, ranking hi thil pawimawh ber a ni lo tih kan hriat a ṭul. Team ṭha ber din turin kan thawk ho ang - tum inangin kan kal tlang ang tih hi ka ring tlat. Pre-season ṭha tak kan la hmang mek a, national team jersey hak hi inchhuanna tham a ni a, chu chu fans hmaah kan pholan a ngai a ni," a ti a, beiseina a nei sang.