Atletico-in Gallagher an la ta nge nge

Atletico Madrid chuan Conor Gallagher chu Chelsea aṭangin an la lut a, a man zat hi pound maktaduai 33 vela ngaih a ni.

Kum 24 mi Gallagher hian kum nga daih contract a ziak. England midfielder hian Stamford Bridge-ah kum khat chauh contract a nei tawh a, nakkum nipui bazara a thlawna a chhuah loh nan Chelsea hian an hralh.

Gallagher chuan, "Ka suangtuahna ram a taka min chantir avangin Chelsea chungah lawmthu ka sawi. Blues kawr hi chhuang takin ka ha ṭhin a, vawi ṭhahnem tak captain armband ka hreng thei kha, ka duhthusam ram chu a ni.

"Hun tawn zawng zawng nuam ka ti a, ka theihnghilh ngai tawh lo ang. Club ṭantute min thlawpna leh min hmangaihna zawng zawngah lawmthu ka sawi e," tiin a sawi.

Chelsea hian Atletico striker Samu Omorodion lak an tum a, mimal inremna an neih theih tak loh avangin Atletico kawr nena thla la hman tawh Gallagher chu London-ah koh let a ni. Spain khawpui Madrid-ah ni nga chhung chu Gallagher hi a awm hman a, tunah erawh Diego Simeone hnuaiah a khel dawn tih a chiang tawh.

Gallagher hian Charlton, Swansea, West Brom leh Crystal Palace ah te loan hmangin a lo khel tawh a, 2022-23 season aṭangin Chelsea first team-ah a khel ṭan. England tan Gallagher hian match 18 a khel a, kum 2021 aṭanga khel ṭanin 2022 World Cup leh Euro 2024 squad-ah a tel a ni.

English midfielder Gallagher-a'n Atletico a pan takah chuan Joao Felix pawhin Chelsea a pan ang. Chelsea leh Spanish club hi Joao Felix chungchangah hian a thuphungin inremna an nei tawh.