Foden aia thiam an awm lo

English football-a mimal chawimawina ngaihhlut hlawh ber, Professional Footballers' Association Men's Player of the Year award chu Manchester City forward Phil Foden-a chanpual a ni a, a player puiten season liam taa player ṭha berah an thlang.

Chelsea thiampuipa Cole Palmer pawhin club tan nomawi chawi nei lo mah se, a mimal hnathawh erawh hmuh kân theih a ni lo a, English midfielder hi Young Player of the Year-ah thlan a ni ve bawk.

English football award ngaihhlut hlawhah English mi pahnihin chawimawina sang an hlawh chhuak ve ve a, 2009-10 season hnua PFA Awards-a English player pahnihin award pahnih an dawn kawpna hmasa ber a ni.

2009-10 season khan, khatihlaia Manchester United striker Wayne Rooney chu Player of the Year atan thlan a ni a, Aston Villa midfielder James Milner chuan Young Player of the Year a dawng bawk - tunah Foden leh Palmer ten an chhunzawm ve leh ta.

Ka lawm e

Foden chuan, "He award ka dawng thei hi ka tan chuan a hlu takzet a, ka hnathawh hi ka chhuangin ka lawm takzet. Ka professional footballer puite ngeiin he award dawng tlaka min ngai hi lawmawm ka ti a, min vote tute zawng zawng chungah lawmthu ka sawi," a ti.

English forward hian season hman zawh takah khan inelna hrang hrangah match 53 khelin goal 27 a khung a, assist vawi 12 a nei. UEFA Super Cup, FIFA Club World Cup leh Premier League nomawi a chawi bawk.

Foden chuan, "Season hmasaah khan hun hlimawm leh duhawm tak kan tawng a, tunah erawh thil thleng tawhte chu dah ṭhain, hlawhtlinna tam zawk chhar tumin hma hun kan thlir a ni," a ti a, an tawpna tur a la nih loh thu a sawi.

Manchester City hian Pep Guardiola hoin season an hmachhawn leh mek a, Premier League-a an match hmasa berah an elpui Chelsea chu 2-0 in an hneh nghal - tun season-ah pawh champion tura beisei ber tia sawi ngam an ni.

Foden a ropui

England tan vawi 41 inlana goal li khungtu Foden tan chuan 2023-24 season kha season chhinchhiah tlak bik a ni a, a mimal ang chuan treble champion an nih ṭum ai pawhin Foden hi a ropui zawk - mimal chawimawina a hui deuh vek.

Foden hian Player of the Year chawimawina a dawn vawi khatna a ni a, Best Young Player-ah chuan vawi hnih thlan a lo ni tawh - Premier League Player of the Season leh Football Writers' Association (FWA) Footballer of the Year-ah thlan a ni bawk.

English forward hian he chawimawina dawng tura a khumte pawh hi an hraw hle. Manchester City tana a khelhpui aṭang pawhin nikuma award dawngtu Erling Haaland leh midfielder Rodri-te chu nominee-ah an lang a, Foden hian a khum.

Anni pahnih bakah hian Chelsea thiampuipa Palmer, Arsenal captain Martin Odegaard leh Aston Villa tana season duhawm tak hmangtu Ollie Watkins-te chu a khum bawk.

Palmer tan chawimawina

Best Young Player chawimawina dawng tura chhawpchhuah pawh an hraw hlawm hle. Mahse, a tawpa dawngtu chu Cole Palmer a ni a, English attacking midfielder hian a phu takzet - London club-a a season hmasa ber hman dan kha tam takin an beisei lo ang.

Palmer hian season hman zawh takah khan inelna hrang hrangah match 48 khelin goal 27 a khung a, assist vawi 15 a nei. Champions League pawh an khel phak lo chungin, league bikah ringawt match 34 khelin goal 22 a khung a, assist vawi 11 a nei.

Chelsea tana a khelh ṭhat em avangin Palmer hi Euro 2024-ah England squad-ah a tel a, bul ṭan pha chiah lo mah se, final-ah hial goal khung zuiin hming a chher hle - he award dawng tura a khum zingah Arsenal chhuanvawr Bukayo Saka pawh a tel.

Palmer hian Saka bakah Manchester United player pahnih Kobbie Mainoo & Alejandro Garnacho, Crystal Palace aṭanga Bayern Munich pan ta Michael Olise leh Brighton & Hove Albion striker Joao Pedro te a khum.