PFA Team of the Year Arsenal-in player thawh hnem

Premier League player-te ngeiin an thlan, Premier League team of the year-ah champion team Manchester City aiin Arsenal-in player an thawh hnem zawk a, panga ngawt an thawh - City hian player pali an thawh thung.

Arsenal player zingah goalkeeper David Raya, centre back inkawpfuh pahnih William Saliba leh Gabriel, West Ham aṭanga an midfielder lakluh Declan Rice leh captain Martin Odegaard te an lang a, City nen champion tuma an inumna kawnga player langsar vek an ni.

Manchester City hian Kyle Walker, Rodri, Erling Haaland leh Phil Foden an thawh thung a, team dang aṭangin Liverpool innghahna lungpui nghet Virgil van Dijk leh Aston Villa striker ṭha mi Ollie Watkins te an lang.

Arsenal chu

Season hman zawh takah Arsenal-in pahnihna ni chungin season an khar a, mahse, player panga ngawt team of the year-ah an thawh tho. Goalkeeper David Raya chu Brentford aṭanga an hawh niin, league match 32-ah vawi 24 clean sheets a nei thei.

Kum 23 mi Saliba leh kum 26 mi Gabriel te inkawp chu tlarhnunga Arsenal tinghettu an ni a, player pahnih hian team of the year-a lan hi an phu hle. Saliba hian league match 38 a khel kim vek a, Gabriel hian league match 36 khelin goal li a khung.

Rice-a'n pound maktaduai 100 man lawih ni chungin Arsenal a zawm a, pressure sang hle tura ngaih a nih laiin Gunners tan season duhawm tak ka hmang - league match 38-ah goal sarih khungin, assist vawi kua a nei. Captain Odegaard pawhin season ṭha tak hmangin league match 35-ah goal riat khungin, assist vawi 10 a nei.

City aiawh pali

Foden-a sulhnu sawi nawn a ngai lo a, player of the year-a thlan a nih miau avangin team of the year-a a lang hi a awm hle. Hetihlai hian best young player Palmer tan erawh hmun a awm lo thung!

Kum 24 mi Haaland-a'n league match 31-ah goal 27 ngawt a khung avangin team of the year-a lan a phu a, season hnih chiah English top flight league-a a khel chungin team of the year-ah a la lang ve ve a, top scorer a ni ve ve bawk.

Season hman zawh takah khan Walker-a'n league match 32 khelin, City an champion theih nan a thawhhlawk hle - team of the year-a lan hi a tan thil thar a ni tawh lo a, vawi li a lanna chiah a ni. City player dang Rodri hi Euro 2024-a Spain a champion pui bawk avangin Ballon d'Or thlengin a hming a ri a, team of the year-a a vawi hnih nana a lang hi a awm hle.

A hming Van Dijk

Mi tam takin Premier League defender ropui ber pawla an chhiar Virgil van Dijk hi fans ṭhenkhatin han tihel ṭhin mah se, Liverpool tana a ṭangkaizia sawi nep theih a ni lo - team of the year-ah a lang leh ta.

Dutch defender hian season hman zawh takah khan league match 36 khelin goal hnih a khung a, tun hi team of the year-a a lan vawi lina niin, Premier League defender ropui, Chelsea captain hlui John Terry, Manchester United legend Nemanja Vidic leh Arsenal chhuanvawr ni ṭhin Tony Adams te a tluk chiah.

Arsenal leh City player ni lo, lang dang pakhat Ollie Watkins hian season hman zawh takah khan league match 37 khelin goal 19 a khung a, Aston Villa-in Champions League an khelh theih nana player thawhhlawk a nih avangin team of the year-a lan hi a phu hle.