Sterling-a'n minute khat pawh a khel lo ang - Maresca

UEFA Conference League playoff round-ah zanin dar 12:30 hian Chelsea-in Stamford Bridge-ah Servette FC an mikhual dawn. Swiss club hmachhawn tur zingah Enzo Maresca chuan Raheem Sterling a tel lo a, a hnuaiah minute khat pawh a khelh loh tur thu a sawi bawk.

Thil dawm dan

Chelsea-in UEFA dan angin inkhelh hma darkar 48-ah player 21 awmna squad (A List) chu an thehluh a ngai a, thlan zingah Raheem Sterling a tel lo.

Sterling bakah hian defender Ben Chilwell, Wesley Fofana leh Tosin Adarabioyo te pawh telh an ni lo. Chelsea hian inkhelh dawnah B List (Under 21 leh home grown) player-te chu an la tel leh dawn tho a, chumi hnah chuan tun ṭuma la tel lo Levi Colwill te chu tel an ni ang.

Chelsea hian zanin hian Stamford Bridge-ah first leg an khel ang a, second leg hi August 29, Ningani zan dar 12:30 hian Stade de Geneve, Geneva-ah an khel leh dawn. Blues hi group stage khel tura an tling phak a nih chuan Sterling hi inelna tak hmachhawn tur chuan a la tel thei tho thung.

A chiang ta

Pathiannia Chelsea-in Man City an hneh loh hmain Sterling aiawhte chuan an hmalam hun tihchian an duh tih thuchhuah an siam, Inkhelh banah Maresca chuan, "Sterling hi Chelsea-a awm turin ka duh a, mahse player zawng zawng tan hmun a awm si lo," tiin a sawi.

Chelsea hian senior team-ah player 42 an kawl mek a, player ṭhenkhat an chhuak dawn tih chu hriat theih mah se Sterling tan matchday squad vawi hniha tel loh hi mualphona a ni.

English forward hian July 2022 khan £50m-in Manchester City hi a zawm a, match 81 khel tawhin goal 19 a khung. Sterling hian Manchester City tana a khelh laiin Premier League nomawi pali bakah FA Cup (1) leh League Cup (5) nomawi te chawi tawh mah se Maresca-a'n squad-a tel tur pawhin a thlang lo.

Nimin tlai press conference-ah Chelsea manager-in engkim a tichiang. Maresca chuan, "Sterling hian ka hnuaiah minute khat pawh a khel lo ang. Amah hi player ṭha tak chu a ni a, mah se ka winger duh ang chi a ni lo," tiin a sawi. England forward hian Maresca hnuaia a khelh loh tur thu a hre ta a, Stamford Bridge chhuahsan mai a ṭul dawn.

£1.27b squad chu

Chelsea senior team squad-ah hian player 42 an awm mek a, an man zat belhkhawm chu pound tluklehdingawn 1.27 a ni pha daih. Blues-in club neitu Todd Boehly hnuaia an player lak dan hian mak tih a hlawh hle.

Manager thar Enzo Maresca tan pawh thutlukna siam a har dawn a, goalkeeper paruk ngawt mai neihte hi a luhai thlak khawp ang. Position tinah a chuang liama player an neih avangin intih lungawi seng pawh a ni lo.

Player 42 te hi manager paruk Maresca bakah Mauricio Pochettino, Thomas Tuchel, Graham Potter, Frank Lampard leh Maurizio Sarri te lakluh an ni a, academy aṭanga senior team-a lut chho an awm bawk.

Beisei a awm?

Chelsea manager Maresca-a'n match zawna Sterling squad-a tel lo a, a chhawr loh tur thu a tichiang bawk. Mamawh aia tam player an neih miau avangin Maresca-a'n a paih ṭhen a ngai a, Pep Guardiola hnuaia intuai hriam tawh Italian coach hian tum mumal a neiah a ngaih theih.

Blues hian Premier League match hmasa bera Manchester City an hmachhawn ṭum pawhin an khel chhe lo a, vanneih ṭum ni se point hlawh chhuak thei an ni hial.

Season liam ta khan Chelsea hi European competition-ah an khel pha tawh lo a, an squad a chhah bawk avangin tun ṭuma inelna an khelh phak hi a pawimawh. Maresca hote hian Swiss club lakah hnehna an chan ngei hi a ṭul a ni.