Sum hman tamna Saudi Pro League an ṭan dawn

Saudi Pro League 2024-25 season chu zanin aṭangin an khel ṭan leh dawn - football chawi vulna leh inkhel thiam ram tia hriat lar ni lo mah se Saudi hian tun hnaiah ngaihven an hlawh hle a, a chhan chu football atana sum an hman tam vang a ni.

Kum tam a la liam lo, hmanni deuh mai kha a la ni - Riyadh leh Jeddah ten Saudi Pro League an zawm kha, season tluan pawh ni loin hlawh an lak dan pawh ni bi a ni ṭhin, tunah erawh hun rei lote chhungin thil a danglam.

Middle East-ah hian Cristiano Ronaldo a kal a, hei hian khawvel a barakhaih - Ronaldo bakah hian Neymar, Karim Benzema leh Riyad Mahrez te an kal bawk, heng player langsar te tana sum chevel hi pound makatduai 700a tling hem mai a ni.

Toney a hnai

Tun nipui bazarah pawh Saudi club-te hi che na leh hle tura ngaih an ni a, mahse thawm nei lian Liverpool forward Mohamed Salah leh Real Madrid forward Vinicius Junior te chu an la thei rih lo.

Premier League club Brentford strier Ivan Toney chu Al-Ahli nen an inhnaih tawh hle a, kar hmasa khan pound maktaduai 35 hum chunga an dawrna chu Bees hian an lo la hnawl rih a ni.

England international Toney hi EPL-ah an chhawr rih lo, club dang nena sawizawm a nih vang a ni. Nipui bazar a la zo lo a, hei vang hian a chhuah ngei rinna a la sang, player langsar pakhat chuan Saudi lam a pan leh ngei dawn niin a lang.

Tun nipui chhung hian European league aṭangin player 14 chuan Saudi Pro League hi an zawm a, an zingah hian Merih Demiral pawh a tel. Demiral chuan, "Saudi Pro League hi miten an ngaih ang ngawt a awlsam a ni dawn lo," a ti.

Champion duh Ronaldo

Cristiano Ronaldo-a'n kum 2022 December thla khan Al Nassr a zawm a, a club tan hian nomawi lian tham chawi a la nei lo - season thar tur chuangchang sawiin Ronaldo chuan, "Season thar, thil tum erawh a pangngai," a ti.

Portugal captain hian Al-Hilal rorelna tih tawp a duh a, season hmasa lama an phak lohna point 14 chu tih zim ngei a duh tih pawh a chiang, league champion ni tur chuan a tir aṭanga bul ṭan fuh a pawimawh ang.

Al Hilal hian tun hnai mai khan Saudi Super Cup-ah Al-Nassr hi 4-1 in an sawp thei a, tuna an team neih leh boruak thlir mai chuan Al Nassr tan hna a hautak dawn hle tihna a ni a, thil theih loh erawh a ni bik dawn lo.

Kum 39 mi Ronaldo hian Al Nassr tana a contract neih lai a hmang zo hnai a, a hma hun a inrinsiak leh mek tawh. A vanglai a liam a, a hun hnuhnung lam a nih zel tawh avangin champion a duhna a hi a sang zual ngei ang tih pawh a chiang.

Al Hilal an inpeih

Champion lai an ni a, season thar khuh hawn nan Saudi Super Cup an lak bawk avangin Al-Hilal chu Saudi Pro League bul ṭan turin an inpeih leh tawh hle - defender Kalidou Koulibaly chuan an inringtawk tih a sawi.

Kum 33 mi Koulibaly chuan, "Season thar kan hman tur hi a hautak dawn hle tih ka hria, kan tan chuan chona lian tak a ni ang. Mahse, nikum pawh khan chona hautak leh harsa tak hi kan lo paltlang tawh.

"Tun season chuan team zawng zawngin Al Hilal hneh theitu nih an chak dawn tih la hria, mahse a awlsam lo ang. Neymar a lo kir dawn, kan tan chuan player ṭha tak lakluh thar ang mai a ni dawn," tiin a sawi.

Brazilian forward Neymar hi hliam vangin a chawl rei ta hle, season hmasa kha a inkhel mumal lo. Thla hmasa tawp lam aṭang khan team training a zawm leh tawh a, harsatna a neih loh chuan September thla velah a inkhelh theih tawh a rinawm.

Al Ahli an awm

Team lian pahnih Al Hilal leh Al Nassr te thawm a lian a, champion tura rinkai pawh an ni. Hetih lai hian Al Ahli pawh sawi hmaih theih an ni bik lo, anni hian Ryad Mahrez, Roberto Firmino leh Firas Al-Buraikan te an kawl avangin an ṭha.

German coach, kum 36 mi chauh Matthias Jaissle enkawl an ni a, season hmasa lama beisei anga che ṭha tawk lo Firmino leh Mahrez te a inkawprem tir thei a nih ngawt chuan anni aia tlarhma hlauhawm tur dang an tam bik chuang lo ang.

Matthias Jaissle chuan, "Team dang nena kan danglamna chu thlawptu kan nei ṭha ṭhin hi a ni, keimahni khelmualah chuah pawh ni loin khualmuala kan feh chhuah pawhin ṭantu kan nei ṭha zel, hei hi season tharah pawh kan tan pawimawh dawn," a ti.

Chawhrualin, season hmasa khan Saudi Pro League hi match pakhat hi mi 8,000 vel zelin a hmunah an en a, player ṭha an lakluh belh zel bakah league tih changtlun zel a nih avangin kuminah chuan entu an pung tura beisei a ni.