Bayern defender Stanisic a hliam

Bayern Munich defender Josip Stanisic chu training an neih laiin hliam, a khup hliam vang hian eng tiang chena rei nge a chawlh dawn hriat la ni lo mah se, hun engemaw ti chhung chu a chawlh a ngai dawn.

Stanisic hian season hmasa khan Bayer Leverkusen tan loan hmangin a khel - Leverkusen tan hian Bundesliga leh German Cup a la a, a club nghet Bavarians hian an lalet leh nghal a ni.

Bayern sporting director Max Eberl chuan, "Vanduai thlak takin Stanisic chu chawlhkar eng emawti chhung kan chhawr thei dawn lo, a dam leh thuai theih nan uluk taka enkawl a ni ang," a ti.

Bavarians hian season hmasa khan nomawi an chawi lo, kum 11 hnuah champion miah loa season an hman tluan lehna hmasa a ni hial, an defender pakhat zawk Hiroki Ito a hliam bawk a, tlarhnung lam duhthusamin an awm thei dawn rih lo.

Defender pahnih Matthijs de Ligt leh Noussair Mazraoui chu Manchester United lamah an hralh tawh bawk a, tun kar tawp hian Bundesliga season thar an ṭan dawn avangin coach Vincent Kompany-a'n a hnung lam rem dan tur a ngaihtuah uluk a ngai hle ang.