Wolves-in Ramsdale an dawr

Premier League club Wolves chuan Arsenal goalkeeper Aaron Ramsdale an dawr a, tun season chhung loan hmanga hawh turin North London club hi an dil mek a, inremna erawh a la awm chiah lo.

Tun kar tir khan Wolves hian Ramsdale lak an duh thu hi Gunners hnenah an thlen a, loan hmanga hawh bakah hian a loan hun a zawh hunah a ngheta lak theihna dan tur pawh an ruahman tel.

Mikel Arteta-a'n Arsenal a din thar ṭan dawn khan kum 26 mi Ramsdale hi a lalut a, rinrawl pawh a ni ṭhin. Mahse, Spanish manager hian Ramsdale hi a duhkhawp lo deuh a, nipui bazar hmasa khan David Raya a lalut.

Raya hi a tirah chuan loan hmanga lak a ni a, tun nipui bazarah khan an lei nghet. Season hmasa Premier League golden glove dawng theitu a ni a, tun season atan pawh rinrawl a ni leh ang.

Season hmasa khan Ramsdale hian Arsenal tan match 11 chauh a khel a, club tan a inlan tam loh avangin England tana khelh phak pawh a harsa - Euro khel tur zingah koh ni mah se Three Lions tan rinrawl a ni phak lo.

Premier League season thar an ṭan a, coach Arteta chuan Raya bawk a hmang - an match hmasa berah Wolves an hneh ṭumin Ramsdale hi khelmualah a lut lo, inkhelh tam a duh a nih chuan a khelh phakna club a zawn a ngai.

Wolves hi pan ta se rinrawl a ni ang em tih chu zawhna awm thei a ni ve bawk - kum 2021 aṭang khan Wolves hian Olympiakos aṭanga an lakluh Jose Sa an hmang a, khel phak tur chuan an inel a ngai ang.