Henin nih rualtu Swiatek

Women's Tennis Association (WTA) chuan ranking thar a ti chhuak a, a chung berah Iga Swiatek a awm chhunzawm. Polish star hnungah hian tun hnaia khel ṭha Aryna Sabalenka a awm thung.

Swiatek hian chawlhkar 117 chhung chu world number 1 nihna a luah ta, number 1 nih rei lamah hranghlui Justine Henin a nihrual ta chiah a, kar leh maiah a record hi a khum ngei dawn bawk a ni.

Kum 1975 aṭang khan hmeichhe tennis ranking hi mumal taka siam a ni, number 1 nih rei zawngah Swaitek hi pariatna a ni ta chiah a, tunah hian kum 23 mi chauh a la nih avangin sulhnu ṭha leh ropui zawkin a la zui ngei pawh a rinawm.

Swaitek hian September thla chhung hi number 1 nihna a luah tlang thei a nih chuan, pasarihna Ashleigh Barty (121 weeks) a nihrual thei dawn a, tuna a thlen chin pawh hi player ropui bikte huang chhung a ni tawh.

Barty chungah hian Monica Seles (178 weeks), Martina Hingis (209 weeks), Chris Evert (260 weeks), Serena Williams (318 weeks), Martina Navratilova (332 weeks) leh Stefanie Graf (377 weeks) te an la awm a ni.