Endikna paltlangtu Sinner

Mipa tennis world number 1 Jannik Sinner chu damdawi hman phal loh a hmang em tih endik a ni a, kumin March thlaa an til tih an endiknaah chuan tum reng vanga dan bawhchhiat a nei lo tih hmuhchhuah a ni.

Indian Wells an khelh lai khan Sinner damdawi ei pakhat chi tihrawl siam chak thei leh thil danga nghawng nei thei nia sawi chu a taksaah hmuh a ni a, vaiw hnih endik a nih hnuah pawh a fihlim lo tih an hmu chhuak.

Sinner hian Indian Wells khelh laia endikna hmasa chu a paltlang lo, hei vang hian tournament a khelh aṭanga a pawisa dawn leh a ranking point hmuh pawh lakletsak a ni. Amaherawhchu, International Tennis Integrity Agency (ITIA) chuan a thil tih hi tum leh tihsual tum reng vanga thleng a ni lo an ti.

Italian tlangval Sinner chuan, "Tunah chuan ka nuna hun nuam lo leh rilru kap em em tu pakhat chu ka kalsan thei ta. Min thlawp tlattu team ṭha tak ka nei a, dan phal loh hman chungchangah chuan theihtawpin a hma latute ka thlawp zel ang," a ti.

Sinner hian tun hnai khan Cincinnati Open title a la a, tun season chhunga nomawi panga a chawi tlinna a ni. Kar leh mai aṭanga khelh ṭan tur US Open atan seeded pakhatna a ni dawn, champion tura rinkai a ni bawk ang.