Chak lo Real an kal zel

Thawhlehni zan khan Real Madrid-in an khelmual Santiago Bernabeu-ah German ral an lian a, Schal­ke-in Spanish club 4-3 in an hneh. Amaherawhchu first leg-ah Real 2-0 in an chak a, a belhkhawmin 5-4 in hnehna an chang a, Champions League quarterfinal an lut.

Goal a sur

Schalke-in chak tumin an khel a, minute 20-naah midfielder Tranquillo Barnetta cross ball chu Christian Fuchs-a'n khung nghalin Real muthlu an harh chiang hle.

German midfielder Toni Kroos ball vawrh luh chu Cristiano Ronaldo-a'n goal-ah a chan tir a, minute 25-naah 1-1 a ni.

Minute 40-naah Schal­ke-in Dutch striker Klaas Jan Huntelaar hmangin hma an hruai nawn a, amaherawhchu first half tawp hma hretin Ronaldo-a'n goal hnihna a khung a. First half-ah 2-2 in inkhel a tawp.

Second half ṭan chiahah German club lamin chance an nei leh nghal a, midfielder Tranquillo Barnetta-a'n Real keeper Iker Casillas tan hna hautak a siam sak.

Minute 52-naah Real-in hma an hruai ve ta a, Karim Benzema thun a ni. Minute 50 la awmah Schalke tan chak turin goal thum dang an mamawh.

German club an beidawng mai lo a, forward Leroy Sane-a'n minute 57-ah box pawn aṭangin mawi takin a pet lut a, minute 83-naah Real Madrid duh loh Huntelaar-a'n a goal hnihna a khung a, Santiago Bernabeu-a inkhel bikah chuan 4-3 a ni.

Amaherawhchu first leg result vangin goal khat dang an mamawh a, Leroy Sane-a'n a hun ṭha a hman ṭangkai loh avangin German club Schalke-in quarterfinal an thleng pha ta lo.

Ancelotti an insawifiah

Real boss Ancelotti chuan, "Zanin thilthleng kha sawifiah thiam pawh a harsa zawk hle. Kan khel chhe hle a, chu chu kan result-ah a lang a ni. First leg-ah

ṭha tak a kan lo khelh tawh kha kan chhawr hlauh a kan vannei hle. A tir aṭang khan inrintawkna kan hloh nghal ringawt a, inkhel tawp thleng khan hlauthawng takin hun kan hmang a ni," a ti.

A hmalam hun tur an zawhna chhangin, "Nikum December thla thleng kha chuan kan khel ṭha a, ka hma lam hun chungchang zawhna kan tawng lo. Kumina bul kan ṭan fuh loh deuh avang hian ka dinhmun a derthawng lo ang, tlu mah ila kan tho leh dawn a ni. Tunah hian kan tlu sawp tihna pawh ala ni lo," tiin Real boss chuan a sawi.

European champion ṭum nga lo ni tawh Real Madrid hi kuminah an chesual fo a, kum 2015-ah ṭum nga ngawt an tlawm tawh. first leg-ah an khelh ṭhat hloh avangin Champions League quarter final chu an lut hram a ni.

Schalke manager Roberto Di Matteo chuan, "Madrid-ah goal li kan khung a, chak result nei chungin kan tla tho. Hriatthiam a har a, chutihrualin kan khelh chhuah danah erawh ka lawm khawp mai," tiin a sawi.