Porto-in Basel an sawp

Estadio do Dragao-ah FC Porto-in an mikhual Basel 4-0 a sawpin Cham­pions League quarterfinal an lut.

Switzerland-ah team pahnih hi 1-1 in an inhneh­tawk a, Portugal-ah erawh an inthlau hle. Thawhlehni zan inkhelah Porto tan Yacine Brahimi, Hector Herrera leh Vincent Abou­bakar te'n goal khat ṭheuh an khung.

Porto hian minute 14-na leka Brahimi freekick hmanga an hmahruaina chu an ṭangkai pui a, goal dang zawng hi second half-a lut vek a ni. Hun tawp hma hretin Basel defender Walter Samuel chu yellow card vawi hnih a hmuh avang­in hnawh chhuah a ni.

Kum 2009 hnu lamah Porto-in quarterfinal an la lut lo a, kum 6-naah chiah an in pet tling. Basel erawhin kum 1974 hnuah Champions League quarter final an la lut lo.

Boss-te thukhawchang

Porto boss Julen Lope­tegui chuan, "Ka phu ang ngeiin quarterfinal kan thleng ta. Group stage aṭang khan kan khel ṭha ṭhin hle. Ka player te khelh danah ka lawm tak zet, ka beisei phak bak aia ṭhain an khel a ni," tiin a sawi.

Basel head coach Paulo Sousa chuab, "Ni­kum lama kan khelh ṭhat kha kan chhawm thei rih lo hi a pawi a ni. Porto-ah khan player quality sang tak tak an awm fur a, chuvangin hmachhawn an harsa takzet. Kan theihna sang ber kan lantir theih loh avangin kan puanthuah kan tel a ṭul ta a ni," tiin a sawi.