Zaninah Inter leh Everton an inlan dawn

Europa League last 16 lut a chiang tawh a, zaninah quarterfinal lut tur an zawng leh dawn. Italian manager Roberto Mancini enkawl Inter Milan bakah English club dam awmchhun Everton an inlan dawn.

Germany-a zin tur Inter

Europa League-ah Italian club an langsar a, panga laiin last 16 an lut. Chung zinga langsar ber chu Inter Milan an ni. Inter Milan hi Germany-ah an zin dawn a, tunhnaia khel ṭha em em VFL Wolfsburg an tum dawn.

Volkswagen Arena-a inkhel turah hian Chelsea duh loh pahnih Kevin de Bruyne leh Andre Schurrle te Wolfsburg tan an ṭangkai lehin a rinawm a, tun season match 20-a goal 16 thuntu striker Bas Dost hi Inter defender te'n an ven uluk a ngai bawk ang.

Wolfsburg hi tun hnai an match vawi ngaah vawi thum chakin vawi khat an khingpuite an draw a, vawi khat an chak lo bawk.

Inter hi tun hnai an match khelh vawi ngaah vawi hnih chiah chakin vawi hnih draw result an hlawhchhuak a, vawikhat an chak lo bawk.

Tun hnaia an khelh dan leh squad an neih dante enin team pahnihah hian chak tur zawk sawi thiam a harsa hle.

Everton-in Dynamo an mikhual dawn

Everton in an khelmual Goodison Park-ah Ukrainian club Dynamo Kyiv an lo mikhual dawn a, Premier League-a an chet ṭhat loh tuam mawi nan Europa League-ah hian thlen san an tum ang.

Tun hnai an match vawi ngaah Everton-in beisei an phak lo a, vawi hnih chiah chak hmel an hmu. Vawi khat an in-draw a, vawi hnih an tlawm thung. An match hnuhnung pahnihah an tlawm avangin Everton hi an buailai a ni a, hetih lai taka luhkhung hi Dynamo tan hun ṭha a ni thei.

Dynamo hi an match hnuhnung pangaah vawi khat chiah chak loin vawi li an chak. Vawi li chak zawn chungin Everton khelmualah an leng lut dawn a, a vawi nga nan chak zawn ngei an tum ang.

Spanish club an innuai dawn

Zaninah Spanish club pahnih an in nuai dawn a, hei hi fan-ten an hmu chak ang.

Villarreal hian tun hnai an match vawi ngaah vawi thum hnehna changin vawi khat chak loh leh vawi khat draw result an nei a, an match hnuhnung berah Celta Vigo 4-1 an sawp a, an phur vanglai tak a ni ngei ang.

Sevilla leh Villarreal hi tun hnai an record aṭang chuan an intluk khawp mai a, Sevilla hi match hnuhnung pangaah vawi thum hnehna changin vawi khat an chak lo a, vawi khat an draw.

An pahnih intawn hnuhnung vawi ngaah Sevilla hi vawi hnih chakin Villarreal vawi khat an chak.