India-in Nepal a mikhual dawn
India leh Nepal in World Cup qualifier an khel dawn a, vawiin zan dar 7 hian an khel ang. Second leg hi Nepal khawpui Kathmandu-ah March 17 hian an khel leh ang.
Indira Gandhi Athletic Stadium, Guwahati-a inkhel tur hi India coach Stephen Constantine tan a vawihnih nana India coach tura ruat a nih hnua a match hmasa ber tur a ni.
Mizo tlangval pahnih telna India
India team-ah hian Mizo tlangval pahnih an tel dawn a, chung te chu East Bengal winger Lalrindika Ralte leh ISL-a Indian zinga goal khung hnem ber Mohun Bagan striker Jeje Lalpekhlua te an ni.
India tan striker tawnhriat ngah Sunil Chhetri bawk a ṭangkai lehin a rinawm a, Mizo tlangval pahnih Didika leh Jejea pawh hi an khel a nih chuan Nepal defender te tan ven uluk an ngai khawp ang. Jeje hi hliam vangin a khelh theih dawn leh dawn loh a la chiang lo.
Nepal striker Anil Gurung hi Shillong Lajong-ah pawh lo khel tawh a, India player-te hrechiangtu a ni. Indonesian Super League (ISL) club Persija Jakarta tana khel kum 23-a upa Rohit Chand hi Nepal tan midfield-a an innghahna tur a ni lehin a rinawm a, kum 17 leka upa Belgium club
ṭha Anderlecht leh RC Genk-a trial nei mek striker Bimal Magar hi mipui hmuh chak nimahse, inhliam vangin a khelh theih dawn leh dawn loh a la chiang lo. VFB Stuttgart-a training nei zo hlim Jagjit Shrestha hi Nepal tan an innghahna tur a ni bawk ang.
Thawnthu hlui
India leh Nepal hi tunhma in vawi 14 lai an lo inhmachhawn tawh a, India a chungnung zawk. India hi vawi 11 chak zawkah ṭangin Nepal erawh vawi hnih chiah an la chak ve a, vawi khat an inhnehtawk tawh thung.
India in Nepal lamah goal 26 an thun tawh laiin Nepal erawhin India lamah goal sarih chiah an la thun ve thung.
Team pahnih an inkhelh hnuhnun ber November 13 khan friendly match-ah India in 2-0 in hnehna an chang a, Sunil Chhetri chuan India tana a goal 42 na a khung nghe nghe.
Nepal hi India an rawn pan dawnin Kathmandu Airport-a thlawhna chesual vangin an tum dan aia tlaiin India an rawn thleng a, practice pawh an nei hman dawn lo a ni.
Eng nge an sawi?
India coach thar Stephen Constantine chuan, "Ka duh angin ka player-te ka la hre chiang tawk hman lo. Mahse, India hi sang tak thlenpui tuma enkawl nawn leh ngat ka ni a, kan theihtawp kan chhuah ang," a ti.
Nepal coach Jack Stefanowski chuan, "He inkhel a tan hian theihtawpin kan inbuatsaih a, result ṭha tak nena haw hi kan duh a ni. India player-te hriatchian tumin I-League leh ISL kha ka en ṭhin a, kan tum tur te hi ka hrechiang tawk a ni," tiin chak an tum tur thu a sawi.
Puerto Rico coach hlui Stefanowski chuan, "Stephen Constantine hi coach ṭha tak a ni a, ani enkawlna hnuaia inkhel tur India tum hi a hautak dawn a ni," a ti.