TBL an sang, an fal lo

Hawla Indoor Stadium-ah thawm a ṭha a, mipui ṭhahnem tak pungkhawmin inkhel hmuhnawm an hmuh vang a ni.

Samsung 3:16 Plan Solution Mizoram Super League a hmuhnawm zel a, basketball thlirtu an tam tulh tulh dawn. Thawhlehni zan khan Khatla TBL-in hmahruaitu nih in chuhna inkhelah Zarkawt BCA 64-61 in an hneh hram a, chak vek awmchhun an ni.

Hmuhnawm chu

Khatla mipui an tam a, ṭhutna chang tam Zarkawt mipui an tam zawk mahin a lang. Thawm ṭha karah inkhel a nung nghal a, BCA leh TBL an inlehthal tawn zak zak a. Zarkawt tan Zorinsanga, Dennis Lalmuanpuia leh David Lalruatfela te an che ṭha a, Khatla-in Lalrinzuala leh Nelson Lalrohlua hmangin an um zel a, first quarter tawp hma hretin TBL an chefuh zawk a, 15-18 in hma an hruai.

Second quarter-ah BCA-in bul an ṭan ṭha a, 26-20 a hma an hruai tak avangin TBL tan coach leh player nikawp H. Laldinsanga kan hmu a; 26-26 a ni chhunzawm nghal. BCA an ṭang leh hret a, half time tawp hma hreta Mapuia hlah zarah 31-30 a ni. Boruak a sang a, team pahnih an inhnehtawk avangin a hmuhnawm a, score erawh a tam tawk lo.

Electric current awm ṭhat tawk loh avangin halftime chawlh a rei hret a, a hmuhnawm dan erawh a ngai reng. TBL tan Gospel Lalthawmmawia a hmuhnawm a, Zarkawt innghahna chu captain Dave a ni. Dave hian third quarter-ah point riat lai a score a, a ṭhiante score let a ni. Amaherawhchu Dave-a'n turnover bakah hnai taka hlah a neih avangin third quarter zawhah TBL 45-43 in hma an hruai.

Fourth quarter ṭan chiahah Nelson leh Eddie Zothanmawia te'n TBL tan point an lut nghal a, 49-43 a nih avangin BCA-in time out an ko a, mamawh chhanna chu veteran player Albert Lalramchuana leh Michael F. Lalawmpuia te an ni. An inum zel a, minute khat pawh tling tawh loah TBL guard Mapuia'n pui takin a drive lut a, nalh taka layup-in a lut zui, 61-58 in an chungnung hret.

Mapuia bawk a pawimawh a, free throw hmuin vawi khat a lut a, 62-58 a ni chiah. Khatla mipuiin chak turah inngai tawh. BCA tan Henry Lalramngaih-awma a tawp lamah a rawn lang ve hram a, three points a lut a, 62-61 niin second 18 a la awm.

TBL-in game an pawt muang a, Mapuia bawkin free throw a hlawh chhuak. Hun pawimawhah tawnhriat nei ṭha Mapuia'n a lut ve ve a, 64-61 a ni. BCA-in time out an ko nghal.

BCA-in TBL overtime hruai thleng turin three point an mamawh a, rawlthar Henry lakah rinna an nghat a, mipui thlir ṭhupna hnuaiah Henry-a'n point thum neih ngei tumin a shoot-a, a lut lo. Inkhel a tawp zui a, Khatla mipui an au a, Zarkawt mipui an reh thung. Inkhel hmuhnawmah TBL an chak hram.

Eng nge an sawi?

Khatla TBL coach/player Mapuia chuan, "Pathian ṭanpuina vang liau liau a, chak thei kan ni. Kan chak vangin kan lawm a, final lut chiang erawh kan la ni lo," tiin a sawi.

TBL chaknaa pawimawh Ma­puia chuan, "Pratice-na kan pha lutuk hi a mak a ni. Hmasawnna tur kan la ngah khawp mai. Publicity a ṭha a, thlirtu an tam a, hlauthawnna kan la ngah lutuk a ni. Tin, kan shooting practice kan ngah tawk lo, tun aia ṭha a kan thawh hi a ṭul a ni," tiin hmasawn an mamawh thu a sawi.

Mipui chungchang sawi zuiin, "Theihtawp chhuahin min ṭawiawm a, keini pawhin theihtawp kan chhuah sak zel ang," a ti.

Zarkawt BCA assistant coach Lalruatfela chuan, "Chak lo mah ila lawmna tur tam tak a awmin ka hria, team ṭha tak TBL kha point 63 lekah kan dang chat thei a, kan chak loh dan pawh hnualna tur a awm lo. Player ṭhenkhat inhliam vangin 100% an la pe thei lo a, kan ṭha chho zel ang," tiin inkhel chungchang a sawi

Afela chuan sawi chhunzawmin, "A tawp set play kha kan tum ang thlapin a kal a, Henry hnenah khan rinna kan nghat a, a vanduai ṭum a ni. Kan chak loh chhan tak erawh concentration kan hloh nasat vang a ni. Kan score chiah khian kan ven tur kan veng ṭhin lo a, awlsam takin an rawn lut leh mai ṭhin. Kan insiamṭhat theih ngei ka ring," tiin a sawi.