Tlai dar 3:00-ah 2013 Santosh Trophy Final Rematch
Santosh Trophy-ah team pali chiah an dam tawh a, vawiin tlai dar 3:00 hian Guru Nanak Stadium, Ludhiana-ah Services leh Kerala te'n semifinal hmasa zawk an khel ang. Vawiin hian Mizoram an awl dawn a, naktuk tlai dar 3:00-ah Punjab nen semifinal hnuhnung zawk ang khel ang.
Services-ah Mizo pahnih Francis Zonuntluanga leh Ramniengmawia te an awm a, Mawia hi 2013-a Services-in Santosh Trophy nomawi an chawi ṭhum khan best player a thlan a ni. 2013-ah khan Services leh Kerala te hun pangngaiah goal awm loin an inhnehtawk a, penalty shootout-ah Services an chak.
Services hian semifinal lut turin Maharashtra leh Assam an hneh a; Punjab leh West Bengal nen an inhnehtawk a, West Bengal lakah chiah goal an chhuah. Services forward Arjun Tudu-a'n goal thum a khung tawh.
Kerala-in semifinal lut turin Goa, Delhi leh Railways te an hneh a, goal an chhuah lo. Mizoram lakah goal khat an chhuah a, an chak loh pui bawk. Kerala tan midfielder Usman Ashik-a'n goal hnih a khung tawh.
Mizoram coach H. Vanlalthlanga chuan, "Ludhiana-ah practice ṭha takin kan nei thei a, player-te chet danin minti hlim hle. Vanneih leh vanduai chu thuhran ni se champion thei squad chu kan nei chiang a ni," tiin a sawi.
Team dang chungchang sawi chhunzawmin, "Services leh Kerala-ah hian ṭha zawk sawi thiam a har a, Services hi Group A hmahruaitu ni mah se Kerala hi ka dah chungnung mah zawk. Chutihrualin final sawi tur chuan Punjab hneh phawt a ngai a, an ram a nih avangin keini pawhin ṭawiawmna ṭha tak mamawh dawn a ni," a ti.
Mizoram hi group stage-ah Jalandhar leh Chandigarh Mizote aṭangin ṭawiawmna ṭha tak an dawng a. Semifinal-ah Delhi-a Mizo awm te'n an ṭawiawm theih beisei a ni a, Guru Nanak Stadium-ah Mizo hla sa tham an awm a nih chuan Mizoram team tan final kalkawng a awlsam sawt ang.