Zaninah Tuikual South leh Zarkawt Serpents

Zirtawpni zan khan Tuikual South-in Zarkawt BCA laka comeback ropui an lantir a, a tluan tling lo nachungin inkhel hmuhnawm a ni.

Zanin dar 8:00-ah Tuikual South-in Hawla Indoor Stadium-ah vawi khat chak tawh Tuikual South-in chak hmel hmu lo Zarkawt Ser­pents an hmachhawn dawn. Samsung 3:16 Plan Solution Mizoram Super League-ah inkhel hmuhnawm besei leh theih a ni.

Tuikual South tan vawi thum khelha point 48 score tawh captain F. Zodinthara leh Vanchuangpuia te hi in­nghahna tur an ni a. Serpents tan Champhai tlangval Hmingthanmawia khelh ṭhat a pawimawh ang.

Eng nge an sawi?

Tuikual captain Dina chuan, "Zarkawt Serpents tum tur hian kan inpeih tawh a, kan phur khawp mai. MSL-a team ṭha ber pahnih ang a mipuiin an ngaih Khatla TBL leh Zarkawt BCA kan tum tawh a, a vanduai zawkah ṭang mah ila kan khel tawk dun em em a ni. Zarkawt Serpents pawh hi Pathian zarah kan hneh ngei ka ring," a ti.

Zarkawt Serpents manager Dino Laldinpuia Chhangte chuan, "Kan huphurh hran lo a, theihtawp kan chhuah ang. Kan kalphung thlak danglam a nasa taka hmasawn turin kan inbuatsaih mek a, player-te lamah pawh a hma aia nasain ṭan kan la nasa," a ti.

Tuikual innghahna Dina leh Serpents manager Dino te hian zanin hian entu ṭhahnem tak an beisei a, an beseina ti hlawhtling theitu chu an chenna veng mipui an ni.