United-a kir duh lo Henriquez

Chilean striker Angelo Henriquez chuan a club Manchester United-ah kir a châk tawh loh thu a sawichhuak.

Croatian club Dinamo Zagreb-a loan a khel mek Henriquez chuan, "Tunah hian Dinamo-in Manchester United aṭanga a ngheta min lak luh dan an ngaihtuah mek a, hei hi ka tan chuan thu lawmawm tak a ni. Dinamo hotute leh fan-te'n min lawm em em a, Zagreb khawpui hi nuam ka lo ti bawk nen kei pawn cham hlen ka duh a ni," a ti.

Kum 20-a upa striker hian kum 2012 August khan Red Devils hi a zawm. Mahse senior team tan vawikhat mah a la inlan lo. Wigan Athletic leh Real Zaragoza-ah te loan in a chhuak a, Dinamo hi loan bawkin a zawm. Croatia-ah hian Henriquez-a'n a theihna tak tak a pholang ṭan a, tun season-ah vawi 17 inlan tawhin goal 11 a khung tawh.