Bethlehem hmachhawn tur Aizawl FC 'thinrim'

Aizawl FC-in coach Victor Lalbiakmawia hnuaiah vanglai an chen a, mahse season liam ta ang thoin a pawimawh hunah tak an chesual. I League club hian I Day Football final-ah Mizoram Police an hneh lo a, nomawi an chan - Covid-19 hnuah nomawi an la chawi leh lo.

Vawiin tlai dar 3:30 hian Aizawl FC-in table mawngphaha awm FC Bethlehem an hmachhawn dawn a, I League club 'thinrim' hmachhawn hi eng club tan mah a chakawm dawn lo. Mahse, coach Victor-a'n hrem vangin goal khung khawl Lalbiakdika an chhawr thei dawn lo a, Bethlehem hna a ziaawm hret ang.

Chutihrualin Aizawl FC hi MPL-a winger nei ṭha ber club an ni a, BD-a awm lo mah se Champhai Zotlang tlangval ang thoa MPL11-a goal nga khung tawh Augustine Lalrochana an kawl. Tun nipui bazara an lakluh Laltlanzova (Zozoa) leh Malsawmzuala Tlangte te an la nei bawk a, BD-a thlakna turah buaina an nei dawn lo.

Winger ṭhate ball pe turin I League nomawi vawi hnih ngawt chawi tawh Samuel Lalmuanpuia an kawl a, Zemabawk North attacking midfielder-in nuam ti taka a khelh theih nan C. Lalmuanpuia leh Lalthankhuma (TK-a) te an awm. Tlarhmaa mal tlat turin theihna nei sang C. Lalhriatpuia a awm bawk a, Aizawl FC squad a ṭha hle.

Tlarhnungah tawnhriat nei ṭha Lalchhawnkima a awm a, ISL-a emerging player of the season ni tawh Lalruatthara an lalut bawk. I League ṭan hmaa MPL11 khelh zawh hman tum a nih bawk avangin Aizawl FC tan MPL11 nomawi chawi loh hi a mawi lo hial zawk ang.

Aizawl FC khingpui tur FC Bethlehem hi dah hniam ngawt a rem lo. MPL11-ah FCB hian point khat chauh an hmu a, I Day Football-ah erawh match li chauh khelh a nichungin point ruk an hmu. FC Bethlehem hian NorthEast United reserve bakah Chawnpui FC an hneh a, champion zui ta Mizoram Police pawh an chhaih buai hle.

Coach Lalhriatpuia pui tura assistant coach Lalthantluanga (T2-a) an lakluh hnuah FCB khelh dan a mumal lehzual a, coach pahnih thawhhona a ṭha tih a hriat theih. Nipui bazara inhawn hun lai a nih avangin Bethlehem an insiksawi hret a, an player ṭhenkhat chhuah hman mah se an player lak thar turte document pawimawh an la tihfel loh vangin an nih tur ang an la ni thei lo thung.