I Day Football a zo tawh, MPL-ah 100% - Police coach

LZ Juice MPL11-ah vawiin chhun dar 12:30 hian I Day Football champion hlim Mizoram Police leh semifinal thleng pha lo Sihphir Venghlun te an inkhel dawn. I Day Football-a an khelh dan thlir chuan an kar a zauh hmel a ni maithei, mahse MPL11-ah chuan an intluktawk - point ruk ve ve an hmu.

Police coach Lalbiaksanga Colney chuan, "I Day Football chu a zo tawh. Champion kan tum a, kan tum ram kan thleng. Tunah chuan I Day Football kan ngaihtuah ṭul tawh lo a, MPL-ah kan rilru zawng zawng kan pe dawn. Player inenchhin a hun lo a, kan ṭhat dan berin kan khel ang," tiin Vanglaini a hrilh.

Sihphir Venghlun lakah Police-in an ṭhat dan bera an khel dawn a nih chuan I Day Football final-a an bul ṭan dan chu an ṭhat dan berah a ngaih theih a; tlarhma lamah Malsawmfela, Lalfakzuala, Lalbiakhlua, F. Lalawmkima leh best player-a thlan Michael Lalbiaksanga te an rawn inlan ngei a rinawm.

I Day Football-ah Tlangmawi rawlthar Michael-a'n hming chher a, MPL-ah chet ṭhat chhunzawm a tum dawn. Aizawl FC laka goal hnih khung thei Michael-a hi a kum a la naupan avangin coach leh a khelhpui player-ten a chunga pressure awm hi an sut kian pui a pawimawh ang.

MPL11-ah Police-in beisei an pha tawk lo a, an result ṭhat loh chhan pakhat chu an tlarhnung phui loh vangah a ngaih theih. I Day Football hmain Mizoram defender FC Lalhmunmawia an lalut a, nomawi an chawi nghal avangin Police-in MPL nomawi humhim turin inrintawkna an nei leh tawh ang. Goalkeeper F. Lalmuanawma a dam tawh a, semifinal leh final-a khel ṭha tak Malsawmkima awl a nih pawhin a mak lo ang.

Sihphir Venghlunin semifinal thleng pha lo mah se an insiamṭha zel tih a hmuh theih a, an tlarhmaten goal an khung theih vangin Police tlarhnung tan pawh buaipui tham an ni. Tlarhmaah hian PC Lalruatsanga, Lalawmpuia leh Malsawmtluanga Pautu te an awm a, Police laka point hlawhchhuah an tum a nih chuan an che ṭhat a pawimawh takzet.