Goalkeeper ropui Neuer-a'n ram tana inkhelh a chawlhsan

Germany goalkeeper Manuel Neuer chuan ram tana inkhelh a chawlhsan thu chawlhsan thu Nilaini khan a puang. Kum 38 mi Neuer hian Germany tan vawi 124 a khel a, FIFA World Cup 2014-ah an ram hi champion puiin Euro 2024 kha ram tana inlan hnuhnun ber a ni.

Bayern Munich goalkeeper Neuer chuan, "Ka chhungte leh ṭhiante nena hun rei tak, uluk taka kan sawiho hnuah, ram tana inkhelh chawlhsan turin thutlukna ka siam. Ka tan chuan thutlukna siam harsa tak a ni a, ka taksa a la chak ṭhaa ka hriat bakah World Cup 2026 khelh pawh ka la châk hle. Mahse, tun hun hi ka tana chawlh hun ṭhaah ka ngai a, Bayern Munich tan ka insawrbing thei tawh ang," tiin a sawi.

Neuer hian 'sweeper-keeper' hna a chelh thei a, a khelh dan huaisen tak avangin fak a hlawh a, khawvela goalkeeper awm tawha ropui ber zinga miah mi ṭhahnem tak chuan a ngai. Gelsenkirchen-ah March 28, 1986 khan a piang a, Schalke 04 aṭanga rawn lar chhuakin Bayern Munich-ah hming a chher.

Germany tan kum bithliah inelna hrang hrang U18, U19, U20 leh U21-ah te a khel vek a, kum 2009-a UEFA Euro U21 champion team-ah pawh player pawimawh a ni. Senior team-ah May 2009 aṭang khan koh ṭan a ni a, Jens Lehmann thlaktu tura ngaih Robert Enke chu November 17, 2009-a amah leh amah a intihhlum avangin beisei aia hmain Germany tana khelh hun ṭha a neih phah.

Neuer hian Ivory Coast an hmachhawn ṭumin Tim Wiese thlakin second half-ah a lut a, a tihsual vangin goal an chhuah. World cup 2010-ah Rene Adler chu Germany no. 1 tura ngaih ni mah se a inhliam vangin Neuer hian hun ṭha a nei a, a hmang ṭangkai hle.

Germany-ah Neuer-a'n hmun pawimawh a chang zui a, World Cup 2014 an champion ṭumin player pawimawh bik niin a phu ang ngeiin Golden Glove a dawng. Bastian Schweinsteiger-a'n ram tana inkhelh a chawlhsan hnuah Neuer hi September 1, 2016 aṭangin captain hna a chelh a, Euro 2024 hmaa hun rei tak a inhliam avangin Ilkay Gundogan-a'n captain hna a chelh ta zawk.

Neuer chuan, "Kum 15 kalta chhunga min enkawltu Joachim Low, Hansi Flick leh Julian Nagelsmann, goalkeeping coach Andreas Kopke leh Andreas Kronenberg te, assistant coach te, ka teammate te, medical department leh DFB staff dang zawng zawngte chungah lawm a, ka tan chuan kum 2023 thlen captain hna ka chelh theih ka chawimawina a ni. Germany kawr hak hi ka ngaina takzet," tiin a sawi.

Germany tan Neuer hian match 124 a khelh aṭangin vawi 81 hnehna a chang a, vawi 51 clean sheet a nei bawk. Neuer awm vang hian khawvel goalkeeper ṭha zinga mi Marc-Andre ter Stegen-a'n khelhna hun a nei meuh lo a, inelna lianah Barcelona keeper hi a la inlan lo. World Cup 2026-ah Ter Stegen hi number 1 tura ngaih a ni.

Neuer chawlh hma hian Germany-a player pawimawh Toni Kroos, Thomas Muller leh Ilkay Gundogan ten an chawlh thu an puang tawh a, coach Julian Nagelsmann-a'n team thar a din a ṭul ang.