ISL- Mizo MC hmasa ber Asawma

India rama football inelna sang ber Indian Super League-ah R. Malsawma, Chanmari chu match commissioner a ni dawn. ISL season 11-na hi September 13, 2024-a ṭan tura ruahman a ni a, Mohun Bagan chu champion lai niin Mumbai City chu ISL Cup champion lai an ni thung.

Asawma hi Mizo zinga AIFF match commissioner pahnihna a ni a, MC hmasa ber chu MFA joint secretary ni lai Lalrawngbawla a ni. Chanmari pa Asawma hian tualchhung chauh ni loin India ram pum huap inelnaah tawnhriat ṭha tak a nei tawh a, I League-a Mizo MC hmasa ber a ni tawh bawk.

I League bikah Asawma hian season thum ngawt tawnhriat a nei tawh a; Durand Cup 2021, National Games 2022, Santosh Trophy leh AIFF Futsal Club Championship 2024 te a enkawl tawhin sulhnu a nei ṭha hle. Mizoram chhungah pawh Asawma'n a thehina a tipung zel a, Mizoram Premier League-ah MC hna a chelh bakah MFA Discplinary Sub Committee member a ni.

Asawma chuan, "Mizo-a ISL MC hmasa ber ka ni thei hi ka lawm a, ka beisei aia hmain ka thleng. AFC hnuaia MC nih theih kan la tum ang," tiin ISL-a tawp a la tum lo a, Asia khawmualpuia football thuneitu sang ber Asian Football Confederation (AFC) hnuaia inelna enkawl ngei tum thu Vanglaini a hrilh.