Chelsea-ah Felix a kir leh ta

Atletico Madrid forward Joao Felix chuan Chelsea a zawm a, London club hian a man atan pound maktaduai 45 an inseng - Stamford Bridge-ah kum sarih khel turin contract a ziak a, Felix chu Chelsea player a ni ta.

Kum 24 mi forward chuan, "Chelsea-a ka lo kir leh thei ta hi ka lawm takzet a, bul ṭan ka châk tawh hle. He hmun ka lo kal hmasak amite kha an lo la awm nual a, chu chuan min titlangnel sawt dawn a ni," a ti.

Tun nipui transfer-ah Chelsea leh Atletico hi an indawr ngun mawlh mawlh hle. Hun rei tak inbiakna an neih tawh hnuah Conor Gallagher pawhin Blues chhuahsanin Atletico hi a lo pan tawh a, hetihrual hian Atletico aṭanga Blues-in striker Samu Omorodion lakluh an tumna erawh a tlawlh thung.

Chelsea hian coach thar Enzo Maresca hoin season an hmachhawn a, tun nipui transfer-ah ringawt player 10 an la lut tawh - player langsar zingah Raheem Sterling chu chhuak tura sawi mek a ni bawk a, transfer-ah thawm an neih chhunzawm zel.

Tu nge Felix?

Kum 16 mi lek a nih lai khan Felix hian Portugal-ah chuan hmelhriat a hlawh daih tawh a, Benfica lamah a hming a chher hle. Portuguese club-a a hming a chher hnuin, July 2019 khan Atletico hi a zawm.

Felix-a man zat hi €126mtd a ni a, hetihlai hian khawvela footballer man to palina a ni phak - kum 20 tling lo player zinga man to pahnihna a ni bawk a, Portuguese forward chungah hian beiseina a sang hle.

Felix hian Benfica tan Primeira Liga-ah season khat chiah hun a hmang hman a, season khat chhung hian inelna hrang hrangah match 43 khela goal 20 khungin, assist vawi 11 a nei a, Atletico-in an club player man to ber ni tura an lei ngam hi a awm hliah hliah.

Mahse, Benfica a chhuahsan hnuah Felix hian ngai a awh leh tawh lo - season khatah goal 10 aia tam khung a nei leh tawh lo a, Atletico-ah Diego Simeone-a beisei angin a khel chhuak lo.

Khualzin mi!

Felix hian Atletico tan inelna hrang hrangah match 131 khel hmanin, goal 34 a khung a, assist vawi 18 a nei - player tam tak tan chuan hei hi a ṭha tawk mai thei a, mahse, euro maktaduai 100 man chuang player tan erawh a ṭha tawk lo.

Atletico hian 2022-23 season chawhnu phei kha chu Chelsea lamah loan-in hun an hmantir a, season hmasa kha Barcelona-ah loan-in a khel leh bawk. Chelsea-a a kal hmasak hian a loan hun a zawh ruala a ngheta inlak theihna dan a awm.

Mahse, Blues-ah hian match 20 khelin goal li chiah a khung a, a hlawhchham tiin a sawi theih. Heti chung hian London club hian a ngheta lakluh zui lam hi an ngaihtuah tho a, mahse, khatihlaia Blues coach thar Mauricio Pochettino chuan Felix hi a duh lo.

Felix a kir a, amah berin Madrid khaw club hi nuam a tih tawh loh avangin chhuah a duh. Sum lama talbuai Barcelona an lo lang a, loan hmangin an hawh - season hmasa khan match 44-ah goal 1o khungin, assist vawi ruk a nei.

Kir lehna chu

Chelsea-a Joao Felix sulhnu thlirin, fans tam takin London club-in an la lut leh hi mak an ti a, season hman zawh taka Barca tana a khelh dan en erawh chuan a mak hran lo - Chelsea-ah a hming chher a tum dawn.

Felix chuan, "London-a ka hun hmasa zawkah khan nuam ka ti hle a, Premier League-ah hian ka la kir leh tur thu ka chhungte chu ka hrilh ṭhin. Chelsea jersey nen ngeia he league-a ka lo kir leh thei hi ka lawm takzet a ni," a ti.

Kum 24 mi lek ni chunga Portugal tan vawi 41 inlana goal riat khungtu hian Benfica tana season khat a khelh khan Primeira Liga nomawi a chawi a, Atletico tan La Liga-ah a champion a, Portugal tan UEFA Nations League nomawi a chawi tawh bawk.

Felix-a hlawh zat hi chiang taka tarlan a awm lo a, hetihrual hian a tam lutuk a rinawm lo. Atletico-ah khan kar khatah £250,000 a hlawh nia sawi a ni a, mahse, loan-a Barca-a a khelh khan kar khatah £66,345 a hlawh niin an sawi.

Engvang nge?

Atletico hian Felix hi awlsam takin an kaltir bik lo - a man atana £45mtd an dawn bakah hian, Blues hian Portuguese forward hi an chhuahtir a nih chuan Atletico hian a man aṭangin share an la nei ve leh dawn a ni.

Heti taka an ui player hi eng vanga chhuah nge an nih? tih chu zawhna awm thei a ni a, a chhanna langsar chu coach Simeone nena an inhmuhthiam loh chu a ni. Kum 2022 khan Atletico CEO Miguel Angel Gil Marin chuan, "Felix hi club-in sum kan thapna lian ber a ni a, player theihna nei sang tak, khawvela a ṭha ber pawl a ni.

"Mahse, a chhan sawi erawh rem vek lo mah se, coach nen an inhmu thiam lo a, amah pawh hian thathona a nei tawh lo. Kan club-ah awm zel se ka duh a, mahse, player ber hian duhdan dang a nei a ni," a ti.

Season hmasa pawh khan Felix hian ualau takin Atletico elpui Barca pan a duhna a tilang a, fan-ten an haw hle. Player enkawl awlsam a ni lo tih a chiang a, coach rorum Simeone-a enkawl theih loh hi coach patuai Enzo Maresca-a'n enkawl zo tak ang maw, tih chu a chhanna kan la hmuh tur a ni e.