Thawhzai rel lo Chawnpui FC

I League thlenga team lo kaihruai tawh B. Malsawmzuala enkawl Chawnpui FC-in niminah an dinhmun ṭha lo siamṭhatna remchang nei mah se, beisei an phak lo a, team thar Ramhlun Athletic lakah 4-1 ngawtin an mualpho!

MPL champion tawh Chawnpui hian league match hmasa panga aṭangin point nga chiah an hmu a, nimin kha an tan insiamremna huna ngaih a ni - mahse, an inkhelh zawh meuh chuan an dinhmun a chhe lehzual a, Ramhlun Athletic-in MPL semifinal khelh an beiseina a sang sawt bawk.

Nimin chhun inkhelah team pahnihin goal an khung lawk thei lo a, goal lut loin chawlhlawk hman a ni. Second half-ah erawh Ramhlun duhthusam a thleng a, goal li ngawt an khung!

Ramhlun club tan Felix Lalruatsanga'n goal a khung chhunzawm zel a, nimin inkhelah goal hnih a khung - Serchhip tlangval hian MPL11-ah goal sarih ngawt a khung ta a, top scorer ni chungin season a khar lo ang tih a sawi theih loh.

Midfielder Isak Vanlalpeka leh Benjamin Lalnunpuia ten Ramhlun Athletic tan goal khat ve ve an khung bawk a, Chawnpui tana hun pek belha J. Lalruatsanga goal khung chu scoreline cheimawina chauh a tling tawh - Ramhlun lakah 4-1 in Chawnpui an mualpho a, an tan kawng a harsa lehzual ta.

Hetihlai hian Ramhlun Athletic erawh SYS-in Chanmari an ngam loh bawk avangin table-ah pathumna an ni ta a, a sang pali zinga season khar turin an dinhmun an sawh nghet zel.