Ka pa zara tun dinhmun thleng ka ni - Walker

Manchester City defender Kyle Walker chuan a football zinkawng hlawhtlin theih chhan chu a pa Michael Walker vang niin a sawi a, inkhelh chauh ni loin mi puitling zawka chhertu a nih thu a sawi bawk.

Walker hian tun hmain Sheffield United leh Tottenham Hotspur tan a khel tawh a, loan hmangin QPR a zawm tawh bawk. Nomawi a chawina hmun tak erawh chu Man City a zawm hnuah a ni thung.

Etihad Stadium a pan hnuah Premier League nomawi paruk, FA Cup pahnih, League Cup pali bakah Champions League nomawi pakhat a chawi tawh, English player hlawhtling berte zinga mi a ni phak.

Kum 34 mi Walker chuan, "Ka inkhel tur min hruai a, ka haw lam min hruai ṭhin bawk. Kan inkhel zo car chhunga ka lut hi ka tih dik loh lai te, ka khelh ṭhat tawk loh laite hi a sawi ṭhin, a nihna takah chuan ka haw ṭhin angreng hle.

"Mahse, ka pa khan hmangaihna vangin khatiang khan min lo enkawl a, ka pa khan chona min lo siamsak a ni. A thusawite ka rilruah a cham reng a, ka theihna hmang ngeia hneh let ka tum tlat ṭhin.

"Ka rilru tihnat leh tihhrehawm a duh avanga khatiang sawi kha a ni lo tih pawh ka hria, kei chuan min chona kha hneh ngei tumin theihtawp ka chhuah ta ṭhin a, chu chuan player ṭha zawkah min chher chhuak," a ti.

A pa chauh ni loin, a nu Tracey-i hnen aṭanga thlawpna a dawn ṭhat thu sawiin Walker chuan, "Kan naupan laia kan inkhelh ṭumin goal thum ka khung a, ka pa chuan kan khelh ṭhat tawk loh thu leh goal ruk khung thei tur ka nih thu a sawi daih ṭhin.

"Chutiang hunah chuan ka nu rilru hi a lo hrehawm ṭhin a, ani chuan ka khelh ṭhat thu leh a lungawi thu hi a lo sawi ve thung ṭhin a ni. Ka puitlin hnuah chauh ka pa chuan ka khelh ṭhat thu min hrilh.

"Ka pa khan hringnun harsa leh hrehawm hmachhawn dan min zirtir a, ka nu khan mipa naupang kha a lo puitlin theihna turin kawng hrang hrangin min thlawp ṭha em em bawk," a ti a, an nu leh pa vanga tun dinhmun thleng thei a ni tih a hrechiang.