Subroto Cup-ah Mizoram an tla

Mizoramin an match hmasa pahnihah goal 18 ngawt khung mah se, an match hnuhnung berah goal hnih an chhuah avangin 63rd Subroto Cup International Football Tournament aṭangin an tla - nimin khan CBSE nen inhmachhawnin, 2-0 in an tlawm.

Match hmasa pahnihah Mizoram hian Tripura (6-0) leh Haryana (12-0) an sawp a, match hnuhnung berah CBSE an hmachhawn. Mizoram tan tlang turin draw tawk mah se, goal hnih an chhuah a, CBSE tana Rajdeep leh Pritam te goal khung chu a chhanletna tur an nei lo.

Subroto Cup-ah hian group tin aṭangin team pakhat chauh an tlang a, a sang berin quarterfinal an lut nghal. Mizoram hian Tripura, Haryana leh CBSE bakah Bihar an awmpui. Mahse, Bihar hi kum dik loa an kal avangin inelnaah an tel phalsak an ni ta lo - hei hi Mizoramin an tuar tiin a sawi theih.

CBSE lakah tlawm mah se, Bihar hmachhawn tur hi la awm se chuan Mizoram tan chance la awm tur a ni a, mahse, match a awm tawh loh avangin vawi khat chak lohah an tla der - Mizoram leh CBSE hi nimin an intawn hma hian vawi hnih ve ve an chak a, goal difference-ah Mizoram dinhmun a ṭha zawk.

Hei vang hian Mizoram tan tlang turin draw result a tawk a, mahse, Mizoramin tharumah CBSE an ngam lo a, a tlawm zawkah an ṭang - uiawm takin coach Lalthawmmawia leh manager Rozamliana te kaihhruai team hian Subroto Cup an mangṭha.