Manchester City-in Gundogan an hnaih zel

Premier League champion Manchester City chuan an captain hlui Ilkay Gundogan chu Barcelona aṭanga laklet tumin an buaipui mek a, he thuziak i chhiar meuh chuan German midfielder hi an la let tawh hial mai thei.

Gundogan hian season hmasa ṭan dawn khan City chhuahsanin Barcelona a pan a, mahse, Catalan club tan season khat a khelh hnuah chhuak thei dinhmunah a ding mek - club lam sum harsat vang a ni.

Barca coach Hansi Flick chuan Gundogan hi a duh lo angin a tirah thang mahse, Germany national team-a Gundogan lo kaihruai tawhtu coach hian cham tura a duh thu a sawi.

Mahse, Flick-a thutlukna aiin club thuneitu lam thutlukna a pawimawh zawk a, Gundogan chhuahtir an duh zawk - club tam tak zingah City an lo lang ve chat a, an hmangaih hmasa hi an lo la hmangaih reng!

Chuti si...

"Tuna duh leh tur si..." tih hi mi tam tak ngaihdan awm thei a ni. Gundogan hian season hmasa ṭan dawn khan City hi captain ni chunga treble nomawi a chawipui hnuah a chhuahsan a, sum harsatna nei tih a hriat sa Barcelona a pan.

Hetihlai hian coach Pep Guardiola chuan Gundogan hi chelh a duh reng a, an hnenah cham se, a ti. Mahse, khatihlaia contract hmang zo tur German midfielder-in contract rei zawng a beisei chu City hian pek an tum lo.

Gundogan a upat ve tawh bawk si avangin City hian 'risk' an la ngam lo a ni ber a, Barca lamah a kal. Borussia Dortmund midfielder hlui hian a mimal tak chuan season duhawm tak a hmang zui a, mahse, nomawi erawh chawi nei loin hun a hmang.

Season a lo thar a, Gundogan hi cham ngei tura ngaih a nih laiin chhuak thei dinhmunah a ding leh ta - German midfielder hi Spain, England, Turkey, Qatar leh Saudi Arabia aṭang te pawhin an ngaihven.

Sulhnu chu

Gundogan hian kum 2016 khan pound maktaduai 20-in City hi Borussia Dortmund aṭangin a zawm a, match 304-ah goal 60 khungin, assist vawi 38 a nei a, nomawi 14 ngawt a chawi hman.

Tun hnaia Germany tana inkhelh a chawlhsan thu puangtu hian Premier League (5), Champions League (1), FA Cup (2), League Cup (4) leh Community Shield (2) a chawi hman a, a sulhnu enin club legend tih loh rual a ni lo.

City-in Gundogan lak let an duh chhan langsar tak pakhat chu rin loh taka Atletico Madrid laka Argentina forward Julian Alvarez an chân leh Norwegian winger Oscar Bobb inhliam vang a ni - Bobb hi thla li tal a chawl dawn.

Premier League champion hian squad tihchhah an duh a, Gundogan hi club-a tlangnel sa, Premier League hre sa a nih avangin City tan chuan ani laklet hi thutlukna fing a ni - kum 33 a ni tawh a, ropui taka a lenna Etihad Stadium hi a football career a mangṭhana a ni lo ang tih a sawi theih loh.

Barca buaina

Catalan club hian sum nei se Gundogan hi chelh an duh ang. Mahse, an nei lo miau a, an hnenah kum khat contract a la nei chungin, a thlawna chhuah an phal hial zawk.

Barcelona hian nipui transfer-ah Dani Olmo chu €60mtd ngawtin an la lut a, mahse, club sum dinhmunin a zir rih loh avangin an ziak lut thei lo - Olmo ziak lut turin Gundogan a chhuah phawt a ngai.

Kum 2013 aṭang khan La Liga hian 'squad cost limit' tih chu an hmang ṭan a, hei hi uchuak taka an sum hman tur venna pakhat a ni a, club-te an tlakchhiat lohna tura venna a ni ber - Barca hian tun dinhmunah an sum hman theih chin an pel.

Hei vang hian Catalan club tan player thar ziak lut turin sum dinhmun chinfel a ngai a, 'squad cost limit' pelh loh a ngai. Chumi chinfelna awlsam chu player hlawh hnem chhuahtir a ni a, Gundogan chhuahtir mai hi an tum ta niin a lang.

Dan hrilhfiah

'Squad cost limit' hian kum khata club sum sen theih zat a veng a ni ber. Infiamna ngawr ngawr lam hawi ni loa an sum hman te, player hlawh leh agent fee bakah club dang laka club tinte sum bat chu chhutsak an ni.

Heta an thil chhut hi kum khata club sum lakluh beisei zat aṭangin paih a nih hnuah, an sum lakluh tura ruahman nen a inbuk tawk loh chuan thuneitu lamin an senso tihniam turin an hriattir ṭhin a, player lakluh zawng zawng ziah luh ngawt theih a ni lo.

Club-te chuan an sum dinhmun hi La Liga-ah an thehlut ṭhin a, annin uluk takin an lo thlithlai a, an fimkhur hle. Entirnan, club sponsorship 'deal' kha sang viau mah se, tun lai market nen a hlutna a inmil loh chuan club sum dinhmun tiṭhatuah chhut a ni chuang lo.

Hei vang hian club tan thuneitute bum a harsa a, sum dinhmun ṭha lo pui, dinhmun ṭha anga awm kha a harsa - hei hi Barca buaina mek a ni a, Olmo ziak lut tura Gundogan chhuah hlan hi an nghakhlel hlein a rinawm!