Forest leh Nketiah inhnaih

Nottingham Forest chuan Eddie Nketiah lakluh tumin hma an la mek zel - Arsenal striker hi pound maktaduai 30 chuang hreta lakluh theih an inring a ni.

Premier League club pahnih hi la inrem chiah lo mah se, Hale End chhuak Nketiah hian Emirates Stadium a chhuahsan hnai tawh hle niin English chanchinbute chuan an tarlang.

Forest hian tlarhma thuam chak ngei an tum a, tun hnai khan Feyenoord hmatawng Santiago Gimenez pawh an ngaihven, mahse EPL tawnhriat nei ṭha Nketiah hi lak theih an duh ber nia sawi a ni.

Nketiah hi Arsenal academy aṭanga inzir chhuak a ni a, 2019-20 season chanve khan Leeds United tan a khel a, a bak chu club dang tan a la khel ngai lo.

Arsenal tan match 168 a khelh aṭangin goal 38 a khungsak tawh - kum 2018 khan senior match hmasa ber a khel ṭan a, English football inelna sang berah hian vawi 38 chauh inkhel bul a la ṭan thung.

Mikel Arteta-a'n Kai Havertz leh Gabriel Jesus te a nei a, tun dinhmunah chuan Nketiah tan Gunners aiawhtu nih beiseina a sang lo, inkhelh tam a duh a nih chuan a khelh phakna tur club a zawm mai a ngai dawn a ni.

Forest hian Aston Villa left-back Alex Moreno chu loan hmanga hawh an tum mek bawk. Villa Ian Maatsen leh Lucas Digne te an neih avangin Moreno hi chhuahtir an hreh lo nia sawi a ni bawk.