Villa-ah Martinez a nghet

Aston Villa goalkeeper Emiliano Martinez chuan contract thar a ziak a, club tan hian kum 2029 June thla thleng cham chhunzawm turin inremna an ziak a ni.

Kum 31 mi Martinez hi tun hma chuan Arsenal player a ni ṭhin, mahse khelhna hmun nghet a chang lo. Inkhelh tam a duh avangin kum 2020 khan Villa hi a zawm, a man zat chu pound maktaduai 17 a ni.

Aston Villa tan hian match 150 chuang a khelhsak tawh a, season hmasa khan Premier League match 34-ah inlanin, goal chhuah lohna match vawi kua a nei.

Unai Emery kaihhruaina hnuaiah hmun pawimawh a chang a, a club hi a vawi khat nan Champions League khel turin a tlinpui - tun season chu European football inelna sang ber an khel dawn a ni.

Martinez hian Villa tan a khelh ṭhat avangin Argentina tan pawh hmun a chang - Qatar World Cup an champion theih nan player pawimawh a ni a, South American ramte inelna Copa America nomawi pawh vawi hnih a chawipui tawh bawk.